“Jew tagħmel is-siġra tajba u l-frott tagħha jkun tajjeb, inkella tagħmel is-siġra mħassra u l-frott tagħha jkun imħassar, għax is-siġra tingħaraf mill-frott tagħha. Ja nisel il-lifgħat! Kif tistgħu intom, li intom ħżiena, titkellmu ħwejjeġ tajba? Għax mill-kotra tal-qalb jitkellem il-fomm. Il-bniedem tajjeb mit-teżor tajjeb tiegħu joħroġ ħwejjeġ tajba, u l-bniedem ħażin mit-teżor ħażin joħroġ ħwejjeġ ħżiena” (Mattew 12:33-35).
Għemejjel ħżiena joqtlu r-ruħ, imma rridu niftakru wkoll li n-nuqqas ta’ għemejjel tajba jmarrduha. B’ebda mod m’aħna nimplikaw li b’xi mod aħna nimmeritaw il-Ġenna minħabba xi opri li għamilna. Xejn affattu! Bl-opra tal-ubbidjenza ta’ Kristu waħdu aħna salvati. Bħalma t-tuffieħa mhijiex il-kawża tas-siġra, iżda l-frott tagħha, hekk ukoll l-opri tajba mhumiex il-kawża tas-salvazzjoni tagħna, iżda sinjal konvinċenti u frott utli tas-salvazzjoni tagħna bil-ħila ta’ Kristu. Mela l-opri tajba huma għemejjel li ħadd mhu salvat minħabba fihom, iżda lanqas mingħajrhom. Il-qaddisin fl-art, li issa saru l-pussess ta’ Sidhom, huma ssiġillati internament bil-fidi, u esternament bl-opri t-tajba.
Luteru jitkellem hemm fuq is-suġġett: “Jekk u meta l-Kristjan jagħmel l-opri tajba, li bihom juri mħabba mal-proxxmu, b’daqshekk ma jsirx Kristjan, jew ġust; imma l-ewwel nett irid ikun Kristjan u ġust, qabel ma jagħmel l-opri tajba. L-opri tajba ma jagħmlukx Kristjan; is-siġra tipproduċi l-frott, u mhux il-frott lis-siġra. Hekk, mela, ħadd ma jsir Kristjan bl-opri, imma bi Kristu.”
Talba: “Kemm nixtieq, o Missier, illi nkun bħal dik is-siġra mħawla ħdejn nixxigħat tal-ilma, li tirrendi l-frott fl-istaġuni tagħha, u ma jidbielx il-weraq tagħha, hekk illi kulma tagħmel isir ġid. Bik, Mulej, u bil-grazzja operattiva fija, din xewqti tista’ ssir realtà. Issodisfali xewqti, f’isem Ġesù Ibnek.”
Comments