“Namarlek taħt ħalfa solenni, fil-preżenża t’Alla u ta’ Kristu Ġesù u tal-anġli magħżulin, sabiex iżżomm dawn l-istruzzjonijiet mingħajr preġudizzji u ma tagħmel xejn bil-favoritiżmu. Tpoġġi jdejk fuq ħadd bl-għaġla, u lanqas tixxierek fi dnubiet ħaddieħor. Żomm lilek innifsek safi. Tixrobx iżjed ilma biss, iżda uża daqsxejn inbid minħabba l-istonku u l-mardijiet spissi tiegħek. Id-dnubiet ta’ xi nies huma pjuttost ovvji, u jmorru quddiemhom għall-ġudizzju; għal xi wħud oħra, dnubiethom isegwuhom wara. Bl-istess mod, l-opri t-tajbin ukoll huma evidenti, u anke dawk li huma xort’ oħra ma jistgħux ikunu moħbijin” (1 Timotju 5:21-25).
Il-priżervazzjoni tas-saħħa fiżika hi wieħed mid-doveri tiegħi, dover li bħad-doveri l-oħra ġieli traskurajt. Daqshekk ieħor wieħed jista’ jmur fl-estrem l-ieħor u jqis saħħtu bħala alla tiegħu. It-triq tan-nofs tiddettali illi teżisti moralità fiżika, bħalma hemm moralità spiritwali, avolja xi wħud donnhom jaġixxu inkonxji ta’ dawn ir-realtajiet. Minħabba f’hekk Pawlu jagħti parir lill-kollega tiegħu biex jieħu ħsieb saħħtu.
La naffordjaw ninsew li qed ngħammru f’ġisem u lanqas mhu lant nikkonsidrawh bħallikieku kollox. Jingħad li s-saħħa hi l-ikbar fost il-possedimenti kollha. “L-aqwa li b’saħħitna,” jgħidulek. Ċabattin pallidu aħjar minn sultan marid, jirraġunaw. Is-saħħa hi barka tremenda, ovvjament – bl-eċċezzjoni tal-mard, għax bil-mard nitgħallmu ħwejjeġ li altrimenti jibqgħu mistura minna. Il-mard ma nfittxuhx. Meta jżurna, però, Missierna kapaċi jaqilbu għall-avvanz ħolistiku tagħna.
Frattant tajjeb ninkludu l-ingredjenti komuni għas-saħħa u għomor twil, ċoè, l-arja safja, ansjetà mill-inqas, temperanza f’kollox, u ħidma fejjieda. Din tal-aħħar importanti. Bħalma magna tissaddad jekk ma tiffunzjonax regolarment, hekk ġisimna jitherra jekk ma nħaddmuhx, anke b’taħriġ sportiv, u moħħna nġebbduh sal-limiti tiegħu.
Mixja kuljum jgħidu tagħmel bagatella ġid; xejn xejn titgħallem tosserva affarijiet interessanti li altrimenti jaħarbu mill-attenzjoni tiegħek. M’hemm ebda mogħdija rjali biex tipproteġi saħħtek, ħlief billi ssegwi d-dettami tas-sens komun. Imma meta l-mira tiegħek tkun illi ssir persuna eċċellenti, skont il-ħidma tal-grazzja fik, tkun diġà qed tutilizza l-aħjar preskrizzjoni biex iżżomm moħħ san f’ġisem san.
Talba: “Mulej, sew jekk għandi saħħa dgħajfa jew qawwija, irrid inħobbok b’saħħti kollha. Kulma tagħnini bih jien nixtieq illi nroddulek lura, biex inkun tabilħaqq sagrifiċċju ħaj li jogħġbok, filwaqt li nroddlok ħajr talli sostnejtni matul is-snin. Infaħħrek għall-fedeltà tiegħek lejja; tabilħaqq hi ġdida kull filgħodu. U l-ħniniet tiegħek ma jonqsu qatt! Iġġeddidhomli kull filgħodu. Int sehmi, u allura nittama fik dejjem. Ħalleluja!”
Comments