“Marija qalet, ‘Ruħi timmanjifika lis-Sid u l-ispirtu tiegħi jeżulta f’Alla s-Salvatur tiegħi, għax ħares lejn l-istat umli tal-qaddejja tiegħu. Ara, minn issa ’l quddiem il-ġenerazzjonijiet kollha se jsejħuli mbierka. Għax is-Setgħani għamel għalija ħwejjeġ kbar; qaddis hu ismu. Il-miżerikordja tiegħu testendi għal dawk li jibżgħu minnu minn ġenerazzjoni għal ġenerazzjoni. Għamel għemejjel potenti bi driegħu; ferrex lis-suppervi fil-ħsibijiet ta’ qalbhom; niżżel lill-potentati mit-tronijiet tagħhom imma għolla lill-umli’” (Luqa 1:47-52).
Kemm kellha raġun meta x-xbejba ta’ Nażaret profetizzat li kull nisel għad isejħilha hienja. Indubjament hi mbierka għal dejjem; fuq hekk ħadd mhu lest jargumenta, għax il-favur divin lejha jiddi u jibbrilla.
Wistin ta’ Ippona jesprimi lilu nnifsu hekk f’waħda mill-prietki tiegħu: “Ħarsu ħuti, u aħsbu sew, nitlobkom, fuq dak li qal Kristu l-Mulej meta medd idu lejn id-dixxipli, ‘Dawn, araw, huma ommi u ħuti. Għax kull min jagħmel ir-rieda ta’ Missieri li hu fis-smewwiet, dak huwa ħija, u oħti, u ommi.’ M’għamlitx il-verġni Marija r-rieda tal-Missier? Irrid ngħid, hi emmnet bil-fidi, nisslet bil-fidi, kienet magħżula mir-razza umana biex tkun hi li minnha jitwieled is-Salvatur. Kienet maħluqa minn Kristu qabel Kristu tnissel fiha. Iva, tassew, l-imqaddsa Marija wettqet ir-rieda tal-Missier. Għalhekk għal Marija ifisser aktar li kienet dixxiplu ta’ Kristu milli kienet omm Kristu. Hija barka akbar għaliha li kienet dixxiplu ta’ Kristu milli kienet ommu. Għalhekk Marija kienet mbierka, għax anke qabel welldet, hi ġarret l-Imgħallem tagħha f’ġufha.
“Araw jekk dak li qed ngħid hux minnu. Darba waħda waqt l-Mulej kien għaddej, iwettaq mirakli divini, u l-folol mixjin warajh, waħda mara qalet: ‘Hieni l-ġuf li ġabek u s-sider li rdajt.’ U kif wieġeb il-Mulej biex juri li l-hena m’għandniex infittxuha fl-irbit tal-familja? ‘Imma tassew ngħidlek, aktar hienja dawk li jisimgħu Kelmet Alla u jħarsuha.’ Għalhekk, mela, Marija wkoll hi mbierka, għax semgħet il-Kelma t’Alla u żammitha. Hi ħarset il-verità f’moħħha aħjar milli ħarset il-ġisem f’ġufha. Kristu hu l-verità; Kristu hu ġisem; Kristu bħala l-verità kien f’moħħ Marija; Kristu fil-ġisem kien f’ġufha, u dak li hu fil-moħħ hu akbar minn dak li jinġarr fil-ġuf.”
Talba: “Nirrealizza, Mgħallem tiegħi, illi mqar jekk tagħtina privileġġi kbar u pożizzjoni għolja, jekk ma nafdawx fik għas-salvazzjoni tagħna, kulma jkun ingħatalna jitteħdilna. Għinna naċċertaw ruħna li ninsabu realment fil-grazzja tiegħek, u ħalli din l-istess grazzja tħarriġna sabiex niċħdu l-empjetà u l-passjonijiet mondani, u ngħixu sensibbilment, ġustament u pjetożament f’daż-żmien preżenti. Ammen.”
Comments