“Anzi, aktar minn hekk, nikkonsidra saħansitra kollox bħala telf minħabba l-valur wisq aktar superjuri li nkun naf lil Kristu Ġesù Sidi. Minħabba fih irrinunzjajt il-ħwejeġ kollha, u nikkonsidrahom biss żibel sabiex niggwadanja ’l Kristu u ninstab fih, mhux li għandi l-ġustizzja personali tiegħi, dik derivata mil-liġi, iżda dik li tiġi permezz tal-fidi fi Kristu – il-ġustizzja mingħand Alla bbażata fuq il-fidi - ħalli nkun naf lil Kristu u s-setgħa tar-resurrezzjoni tiegħu u x-xirka tas-sofferenzi tiegħu, billi nkun ikkonformat ma’ mewtu, sabiex b’xi mod nilħaq ir-resurrezzjoni mill-imwiet” (Filippin 3:8-11).
Il-Kristjan, bħal Marija meta laqgħet lil Ġesù f’darha u ntefgħat ma’ riġlejh tisimgħu, messu dejjem jagħmel l-aħjar għażliet. L-aqwa ħaġa hu t-tagħrif salviviku t’Alla tagħna, manifestat f’Ibnu. Hawn jinġabar l-għerf, il-qdusija u l-feliċità kollha tagħna. Tkun taf lil Ġesù jimplika temmen fih. Temmen fih tissinifika tħobbu. Tħobbu billi tosserva l-kmandamenti tiegħu.
F’kull qagħda, f’kull staġun, u f’kull ċirkostanza jew post, dil-ħaġa essenzjali, it-tagħrif vitali ta’ Ġesù, dejjem neħtiġuh. Hu l-appan tal-bluha naħsbu li nistgħu ngħaddu mingħajru. Jekk il-Kristjan igawdi s-saħħa fiżika, ħa jrodd ħajr; iżda kemm messu jeżulta illi jagħraf lil Alla. Dan hu s-sliem u l-hena tiegħu. Jekk għaddej mill-mard, il-fatt li jagħraf lil Ġesù hu l-aqwa mediċina għalih, li terfgħu u tirrestawrah.
Jekk hu mġarrab, l-iprem konsolazzjoni hi illi Ġesù wkoll kien imġarrab bħalna f’kollox, sabiex ikun kwalifikat biex jissokkorri lill-imġarrba. Jekk il-Kristjan hu ssikkat bid-dnub, u l-kuxjenza tikkundannah, kapaċi jisfida u jgħid, “Min se jġib xi akkuża kontra l-magħżulin t’Alla? Alla hu dak li jiġġustifika” (Rumani 8:33). Kapaċi jiddikjara bl-ikbar konfidenza, “Issa m’hemm ebda kundanna għal dawk fi Kristu Ġesù” (Rumani 8:1).
Jekk il-Kristjan hu mbeżża’ mill-mewt, it-tagħrif tal-evanġelju jgħinu jżarmaha mill-qawwa u n-niggieża tagħha, li hi l-liġi u d-dnub. Hekk ikun kapaċi jisfida trijonfalment, “Ja mewt, fejn hi l-vittorja tiegħek? Ja mewt, fejn hi n-niggieża tiegħek?” (1 Korintin 15:55). Filli joppossiedi l-ħaġa waħda, il-ħaġa indispensabbli, hu preparat biex jiltaqa’ m’Alla wiċċ imb wiċċ.
Talba: “Alla Missieri, int diġà trattajt il-ħtija tiegħi billi ġġustifikajtni bid-demm ta’ Ibnek; qed tittratta miegħi billi bl-Ispirtu tħarriġni biex ma nibqax taħt id-dominju kattiv tad-dnub; wegħidtni saħansitra li għad teħodni f’darek fejn inkun meħlus mill-istess preżenza tad-dnub. Ħalleluja! Glorja u foħrija lilek.”
Comments