“Imbagħad deherlu anġlu tas-Sid, wieqaf fuq il-lemin tal-artal tal-inċens. Malli rah, Żakkarija kien iddisturbat u qabdu l-biża’. Imma l-anġlu qallu, ‘Tibżax, Żakkarija, għaliex il-petizzjoni tiegħek instemgħet, u martek Eliżabetta se tilidlek iben, u int issejjaħ ismu Ġwanni. Bih ikollok ferħ u eżultanza, u ħafna se jifirħu bi twelidu. Għax se jkun kbir f’għajnejn is-Sid, u qatt m’għandu jixrob inbid jew likur ieħor. Għad ikun mimli bl-Ispirtu s-Santu mqar meta jkun għadu f’ġuf ommu. Hu se jdawwar ħafna minn ulied Iżrael lejn is-Sid Alla tagħhom. Huwa dan li se jmur quddiemu fl-ispirtu u s-setgħa t’Elija, biex ‘idawwar qlub il-missirijiet lejn it-tfal,’ u d-diżubbidjenti għall-għerf tal-ġusti, ħalli hekk jipprepara għas-Sid nies imħejjija’” (Luqa 1:11-17).
Il-kobor tal-bniedem jitkejjel fir-rieda tiegħu illi jibqa’ fiċ-ċkunija tiegħu; ikun lest jonqos biex jikber Sidu fl-istima tan-nies. Xi persuni tlaqqmu bit-titlu ta’ kbir: Alessandru l-Kbir, Katerina l-Kbira, Erodi l-Kbir. Imma ħadd mhu leġittimament kbir jekk mhuwiex twajjeb. Trid tkun kbir fil-virtù biex tkun tabilħaqq kbir, altrimenti t-titlu tiegħek jservi aktar ta’ tmasħir milli indikazzjoni ta’ xi preġju mixtieq.
Apparti r-rabta u s-sottomissjoni tiegħu lejn Sidu, il-pedament essenzjali, il-bniedem kbir jingħaraf mill-ġenerożità fl-intenzjoni tiegħu, is-sensittività lejn sħabu l-bnedmin fl-eżekuzzjoni tal-pjan, u finalment il-moderazzjoni tiegħu fis-suċċess. Ma jitlifx rasu fl-arroganza jew jistaħba wara umiltà falza. Hu kbir għax rebaħ fuqu nnifsu billi ħalla lis-Sid Suprem itaħħtu għas-servizz tiegħu. Il-kobor tiegħu jikkonsisti mhux billi jkun setgħan, imma fl-użu xieraq ta’ setgħetu. Fl-aħħar mill-aħħar mhijiex setgħetu per se, imma poter spiritwali investit fih.
Il-bniedem ma jitwilidx kbir imma jista’ jsir kbir. Dan iwettqu eżattament fil-grad li bih jirsisti għall-benesseri u l-avvanz tal-ġens uman, ċoè jservi lill-ġirien immedjati tiegħu. Jista’ jagħti l-każ li qatt ma ttawwal mir-raħal tiegħu ’l barra, u xorta waħda jikseb isem ta’ kobor. Għax il-kobor huwa wkoll ta’ dak id-dudu tal-ħarir, insinifikanti u sieket, li jagħmel xogħlu minn mument għall-ieħor u minn siegħa għall-oħra, bla ma jiġbed l-attenzjoni tal-ġurnalisti u bla ma jissemma fil-kronaka.
Meta nidentifikaw ruħna ma’ kawża kbira, neċessarjament niżviluppaw dik il-laqta ta’ kobor veru. M’hemm ebda kawża ikbar milli nistinkaw biex tiġi stabbilita s-saltna ta’ Kristu fuq l-art, ċoè, il-gvern ruħani tiegħu fi qlub in-nies, fil-ġustizzja, fil-ferħ u s-sliem. Għat-twettiq ta’ aġenda bħal din qalbna tkun imkebbsa, imsaħħna b’fervur ispirat mill-verità. Impenn kajman ma jwassal imkien, u ebda proġett kbir ma jseħħ mingħajr entużjażmu.
Talba: “Mulej Ġesù, agħmel illi jkollna l-istess mira tal-Battista, meta qal, ‘Hu jeħtieġ jikber imma jien jeħtieġli nonqos.’ Int il-preminenti; aħna sempliċement servi tiegħek. Għax meta tabilħaqq inservu nkunu kbar f’għajnejk, u dan ikun biżżejjed għalina. Ħa nkunu kuntenti fir-rwol li tajtna x’inwettqu. Ammen.”
Comments