“L-imħabba qatt ma tispiċċa. Imma sew jekk hemm doni ta’ profeziji, għad ikunu aboliti; jew ilsna, għad jehdew; jew tagħrif, għad jkun abolit. Għax nafu parzjalment u nipprofetizzaw parzjalment, imma meta jiġi l-perfett, il-parzjali se jkun abolit. Meta kont tifel, tkellimt bħal tifel, ħsibt bħal tifel, irraġunajt bħal tifel. Meta sirt raġel, warrabt il-ħwejjeġ tiflin. Għax bħalissa naraw immaġni mċajpra, qisu f’mera, imma mbagħad naraw wiċċ imb wiċċ. Bħalissa naf parzjalment, imma mbagħad inkun naf fis-sħiħ, bħalma wkoll intgħaraft fis-sħiħ. Għalhekk issa jibqgħu dawn it-tlieta: il-fidi, it-tama u l-imħabba. Imma l-ikbar minn dawn hi l-imħabba” (1 Korintin 13:8-13).
Id-dnub, fir-renju u s-setgħa tiegħu, jista’ jikkoabita ma’ doni naturali mill-aktar eċċellenti taħt l-istess saqaf, ossija, fl-istess qalb. Wieħed jista’ jkun oratur u giddieb fl-istess ħin; jista’ jkollu lsien anġeliku u qalb demonika. Tista’ tkun skular magħruf u sepulkru mbajjad, kif kienu bosta mill-Fariżej, Sawl ta’ Tarsu l-ewwel wieħed. Ħa ngħassu mela kontra l-possibbiltà li d-doni tagħna ma jkunux bħal ingwanti ta’ ħarir fin mixdudin fuq idejn inkallati.
Id-doni nutilizzawhom, mhux bi skop ulterjuri, iżda għall-avvanz ta’ nies li huma f’kuntatt magħna. Nifhmu wkoll illi akbar m’int akbar hemmek; iżjed m’int donat, probabbilment iżjed se jkollok tgħodd in-nefqa. Il-kapott ta’ Ġużeppi għamlu isbaħ u aktar prominenti minn ħutu, iżda kkawżalu s-saram kollu tiegħu. Hekk talenti jew doni kbar jelevawk tikka ogħla minn ħaddieħor f’għajnejn is-soċjetà, iżda faċilment ikunu okkażżjoni ta’ bosta provi.
Min hu fil-baxx jibqa’ eżentat minn dal-gwaj. M’inix ngħid hekk biex niskuraġġixxi jew inberred il-fjamma tal-entużjażmu; sempliċement qed nagħmel osservazzjoni. Allura, bid-doni mogħtija lilek, fittex servi – b’umiltà, fervur, u rieda tajba. Iżda tiddependix fuq kisbietek: Kristu biss kien u jibqa’ l-garanti tiegħek quddiem l-iżbarra tal-ġudizzju t’Alla.
Talba: “Grazzi għad-doni li tajtna, Mulej, biex bihom naqdu u nedifikaw lil xulxin. Flimkien magħhom assiguralna illi x-xogħol prodott mill-fidi tagħna jkun kotran, it-taħbit imqanqal mill-imħabba jkun sinċier, u l-kostanza mnebbħa mit-tama f’Sidna Ġesù Kristu żżommna mexjin tul it-triq id-dejqa li twassal għall-ħajja fil-preżenza tiegħek.”
Comments