“Hieni kull min jibqa’ mill-Mulej u jimxi fi triqatu! Għax int tiekol minn xogħol idejk; hieni int, u jaħbatlek tajjeb! Martek tkun bħal dielja li tagħmel il-frott fl-irkejjen ta’ darek; uliedek ikunu bħal xital taż-żebbuġ madwar il-mejda tiegħek. Ara, hekk ikun imbierek il-bniedem li jibża’ mill-Mulej. Il-Mulej ibierkek minn Sijon, u int tara l-ġid ta’ Ġerusalem tul ħajtek kollha. Iva, int tara wlied uliedek! Is-sliem fuq Iżrael!” (Salmi 128:1-6).
Din hi wegħda mogħtija lil wieħed li jibża’ minn Alla u jimxi fi triqat il-qdusija bla ipokresija. Ikollu barka domestika; martu u wliedu jkunulu sors ta’ kuntentizza kbira fid-dar. Bħala membru tal-knisja jixtieq jara l-kawża t’Alla ssib ir-risq, għax jinsab ikkonċernat għal dar il-Mulej, daqskemm hu kkonċernat għal daru. Meta l-Mulej jibni darna, jixraq ukoll li nikkoltivaw ix-xewqa li naraw dar il-Mulej mibnija wkoll. It-tajjeb u l-ġid tagħna mhuwiex verament tajjeb jekk kemm-il darba ma mmexxux ’il quddiem il-ġid tal-knisja maħtura t’Alla bih.
Iva, tieħu barka meta titla’ fil-ġemgħat ta’ Sijon; tkun mgħallem, mgħajjex u mfarraġ, fejn jitla’ t-talb u t-tifħir, u tingħata xhieda tas-Sagrifiċċju l-Kbir. “Il-Mulej ibierkek minn Sijon.”
Mhux int biss tiggwadanja. Il-knisja wkoll tagħmel progress; il-fidili jkunu mmultiplikati. Ix-xogħol qaddis tagħhom ikun inkurunat bis-suċċess. Alla jwettaq din il-wegħda f’ċerti nies grazzjużi tul għomorhom kollu. Meta jmutu l-kawża ta’ Kristu sikwit tmur lura. Ejjew inkunu fost dawk li nġibu aħbarijiet tajba lil Ġerusalem ħajjitna kollha.
Talba: “Bħalma kont dari hekk għadek illum, Mulej, għax int ma tinbidilx. Xorta waħda għadek tressaq nies lejk biex jgħammru taħt il-ħarsien tiegħek u jesperjenzaw barkiet speċjali mingħandek. Iffavorini biex inkun it-tali persuna, biex nara l-ġid għall-knisja tiegħek tul għomri. Ammen.”
Comments