“Jien innifsi, Pawlu, nappellalkom f’ġieħ il-manswetudini u l-ġentilezza ta’ Kristu – jien li nkun ‘timidu’ meta wiċċ imb wiċċ fostkom, imma meta assenti ‘kuraġġjuż’ lejkom! Nagħmlilkom petizzjoni ħalli meta nkun preżenti ma jkollix għalfejn inkun kuraġġjuż bil-kunfidenza li biha nipproponi li nissogra naġixxi kontra xi wħud li jqisuna bħala nies li nimxu skont l-istandard ta’ did-dinja. Għax għalkemm ngħixu fid-dinja, ma niggwerrawx kif tagħmel id-dinja. Infatti l-armi tal-iggwerrar tagħna mhumiex karnali, iżda setgħanin b’Alla għad-demolizzjoni ta’ fortizzi. Aħna niddemolixxu argumenti u kull pretensjoni li tintrefa’ ’l fuq kontra t-tagħrif t’Alla, u nikkaptivaw kull ħsieb għall-ubbidjenza ta’ Kristu. U aħna lesti ħalli nikkastigaw kull diżubbidjenza, meta tkun kompluta l-ubbidjenza tagħkom” (2 Korintin 10:1-6).
Hawn min jidħollok qisu gaffa tal-bini, guffaġni waħdu u rozzaġni ssemmix. Frattant ma nstab xejn aktar segħtan mill-ġentilezza, u xejn daqshekk ġentili mis-setgħa reali. Il-qawl, bil-kelma t-tajba toħroġ il-far mit-toqba, jagħti sens ta’ direzzjoni lil min għandu ħabta jfur għal kull nitfa. Għax anke meta niżbaljaw, il-ġentilezza tikkoreġi kulma hu offensiv fil-manjieri tagħna.
Nifhem li kultant, f’każijiet kritiċi, twiddiba jew ċanfira fid-dieher hemm postha, imma l-insalata tar-relazzjonijiet reċiproċi tagħna jaqbel li ngħinuha aktar biż-zejt tal-ġentilezza milli bil-ħall tal-avvertimenti iebsa. Mod wieħed kif id-dixxipli jaħslu saqajn xulxin hu billi jwiddbu jew jirrimproveraw lil xulxin. Imma t-twiddiba ma tridx tkun imkartsa f’diskors mgħaddab, għax altrimenti l-effett jinqered; lanqas fi kliem tant mans illi ma jilħaqx l-effett tiegħu. L-istess bħal meta taħsel saqajn ħuk, ma tużax il-misħun għax tismothomlu, u lanqas ilma friżat għax tkessaħhomlu.
Il-ġentilezza fl-aqwa tagħha hi espressjoni ta’ mħabba. Lill-individwu nkunu qed nuruh li rridu nistmawh dejjem u f’kull ċirkostanza bid-dinjità li tixraqlu, għax avolja x-xbieha t’Alla fih forsi tkun mibruxa jew virtwalment imħassra, xorta waħda jippriżerva fih eku ta’ min ħalqu. U dak l-eku jagħmel id-differenza kollha. Bil-ġentilezza, mela, nagħmluha eħfef għalina nfusna biex ningwalawha ma’ ħaddieħor, anke ma’ nies li jipprovaw jabbużaw minna.
Biha nuru konsiderazzjoni f’waqtha. Biha nestendu lilna nfusna b’sentimenti teneri, u bi prontezza ta’ simpatija. Sikwit l-aħjar ħaġa li nagħmlu meta għandna ħabibna miġugħ hu li naqsmu l-uġigħ miegħu – inkunu hemm anke meta m’għandna xejn x’noffru ħlief il-preżenza tagħna, u mqar meta l-fatt li aħna preżenti jkiddna u jweġġagħna. Hi l-applikazzjoni tal-imħabba bid-delikatezza li kapaċi trawwem, għax l-imħabba ma taħsibx fiha nfisha, imma tfittex il-konfort u l-faraġ ta’ ħaddieħor.
Talba: “Ġesù, Mgħallem tagħna, int tistedinna nistrieħu fik għax int ġwejjed u umli f’qalbek. Bil-ġentilezza fil-maturità sħiħa tagħna nkunu qed nesibixxu l-ġmiel ta’ dak il-virtù inkomparabbli, esibit fik, il-manswetudni. Tħalliniex naqgħu lura minn din l-isfida. Bħalek nixtiequ nittrattaw ma’ ħaddieħor hekk li ftila ddaħħan ma nitfuhiex u qasba mġelġla ma niksruhiex.”
Comments