“Issa nitolbu ’l Alla biex ma tagħmlu ebda ħażen. Mhux sabiex aħna nidhru bħala approvati, iżda sabiex intom tagħmlu s-sewwa, u dan avolja aħna nkunu nidhru bħala diżapprovati. Għax ma nistgħu nagħmlu xejn kontra l-verità, iżda biss favur il-verità. Nifirħu kull meta aħna nfusna dgħajfin imma intom setgħanin; u dan nitolbu, għall-perfezzjonament tagħkom. Minħabba f’hekk qed nikteb dawn il-ħwejjeġ meta jien assenti, sabiex meta nkun preżenti ma jkollix għalfejn nittratta magħkom severament, skont l-awtorità li s-Sid tani għall-edifikazzjoni u mhux għad-demolizzjoni tagħkom. Finalment, l-aħwa, ifirħu. Immiraw għall-perfezzjoni, isimgħu mill-appell tiegħi, kunu fehma waħda, għixu fis-sliem. U Alla tal-imħabba u tas-sliem se jkun magħkom. Sellmu ’l xulxin b’bewsa qaddisa. Isellu għalikom il-qaddisin kollha. Il-grazzja tas-Sid Ġesù Kristu, u l-imħabba t’Alla, u x-xirka tal-Ispirtu s-Santu jkunu magħkom ilkoll” (2 Korintin 13:7-14).
Mexxej fi knisja għandu awtorità reali u huwa mistenni minnu li jħaddimha meta meħtieġ. Imma l-imħabba timmotivana lkoll biex ninqdew bil-ħlewwa, bil-ġentilezza u l-persważjoni raġunevoli aktarx milli azzjoni drastika li pjuttost tweġġa’ u tinżel morra ma’ ħafna. Elija kien kuraġġjuż, bla moderazzjoni; Eli kien moderat ma’ wliedu Ħofni u Fineħas (ma ċanfarhomx iebes meta kien hemm bżonn). Il-linja medjana jurihielna Ġesù Kristu: qlubija b’moderazzjoni. Pawlu tgħallem ikun moderat filwaqt li l-kuraġġ qatt ma naqsu biex jittratta l-għaqqux li jinqala’. Mexxejja bħalu huma valutati.
Naraw kif filwaqt li jafferma l-awtorità tiegħu jippreferi l-mogħdija tenera, temperata, ġentili, għalkemm l-għażla ta’ x’jadotta tibqa’ f’idejn il-knisja. Juża espressjonijiet diversi ta’ moderazzjoni, indulġenza, tenerezza u manswetudni. Jippreferi jidher skwalifikat hu nnifsu, imbasta l-Korintin jindmu. It-talb sikwit huwa s-soluzzjoni ta’ dilemmi li altrimenti ma jkunx hemm soluzzjoni għalihom. Alla huwa l-qorti finali tal-appell tagħna, għalkemm it-talb ma jagħtina ebda skuża għall-passività.
Pawlu jaf il-limiti imposti fuqu, u ma jażżardax imur ’l hemm minnhom: kull azzjoni tiegħu tippromwovi l-verità tal-evanġelju; kull pass li jieħu bil-għan li l-knisja tkun imsaħħa. Dal-prinċipju kien mgħerreq sew fih. Ħasra li xi mexxejja tal-knejjes li ġew wara ttrasgredew dil-linja ta’ moderazzjoni, u nqdew bl-awtorità tagħhom biex jgħakksu flok jaġevolaw il-poplu t’Alla. Għalih is-saħħa u l-kompletezza tal-fidili kienet prijorità, akkost li jkun dgħajjef hu. Jittratta magħhom bi spirtu ta’ patrijott għas-saltna t’Alla: ħa jkun tellief hu, l-aqwa li l-knisja tkun rebbieħa. Jeżisti għall-knisja, mhux il-knisja teżisti għalih. X’attitudni eċċellenti! X’każ ta’ emulazzjoni joffrielna!
Mill-aktar fis possibbli jrid li l-iżgangat jissoda u l-imgħawweġ jiddritta. Jippreferi ma jkollux għalfejn ixejjer il-ħatar tad-dixxiplina. Jekk l-ulied jaslu biex jirranġaw waħidhom, mingħajr indħil mill-ġenituri, tant l-aħjar! Jerġa’, l-ulied aħjar tfehimhom bil-kelma t-tajba milli bis-sawt. Imma jekk ma jridux jifhmu, x’alternattiva jkun fadal? Ebda missier ma jieħu pjaċir isawwat, anzi, is-sawt ixarrbu bid-dmugħ tiegħu stess biex iweġġa’ inqas. Amor vincit omnia – l-imħabba dejjem tirbaħ.
Talba: “Ħa nkunu imitaturi tiegħek, Mulej ħanin. Ikkonvinċina illi l-eżortazzjoni, l-appell, it-traħħim u r-rikjesta, preżentati urġentement u jaħarqu, għandhom ħabta jolqtu l-kuxjenza aktar minn leġislazzjoni riġida, inflessibbli u tirannika. Qawwina biex inkunu kapaċi nitbaxxew ħa nwieżnu lill-oħrajn. Ammen.”
Comments