“Ftakar fil-patt tiegħu magħhom, u sogħob bih skont il-kobor tat-tjieba tiegħu. Għamel ukoll li jsibu l-ħniena ta’ dawk kollha li kienu jassruhom. Salvana, o Mulej, Alla tagħna, u iġmagħna minn fost il-ġnus, biex inroddu ħajr lill-isem qaddis tiegħek, u biex niftaħru bit-tifħir tiegħek. Imbierek il-Mulej, Alla ta’ Iżrael, minn dejjem għal dejjem! U ħa jgħid il-poplu kollu, ‘Ammen! Faħħru lill-Mulej’” (Salmi 106:45-48).
Raġel xwejjaħ u fqir instab bieżel iħawwel l-għoros tat-tuffieħ u jlaqqam. Żagħżugħ, biex jinkih, interrompieh. “Nann,” qallu, “hemm x’int tagħmel tfekren, bħallikieku għad għandek it-tama li se tiekol mill-frott ta’ dawn is-sġajriet?”
L-anzjan iddritta u warrab l-għodda minn idejh. Qallu, “Ibni, xi ħadd żmien ilu, qabel twelidt jien, indenja jħawwel is-siġar tal-frott għalija, biex ikolli x’niekol. Issa qed inħawwel għal ħaddieħor, avolja ma nafx min se jiekol minnhom, sabiex il-mafkar tal-gratitudni tiegħi jibqa’ jeżisti meta nkun għaddejt għad-dinja l-oħra.”
Meta tħossok grat bla ma tesprimi l-gratitudni tiegħek tkun qed tkartas rigal mingħajr ma tagħtih. Għaldaqstant meta tistenbaħ filgħodu, rodd ħajr għad-dawl mieles u beninn tal-jum f’żgħoritu. Rodd ħajr għal nifsek u saħħtek, għall-kolazzjon u l-kafè jfuħ fl-istanjata. Rodd ħajr għall-ferħ fil-ħajja, li jisponta naturalment bħalma n-nebbiet jidher wara ħalba xita. Jekk ma ssib ebda raġuni għala jmissek trodd il-ħajr, ibqa’ assigurat li d-difett jinsab fik biss.
Platun nadar madwaru bin-nuċċali mċajpar tan-natura, u elenka diversi raġunijiet għala jmissu jkun grat. L-ewwel, qal, għax Alla ħalaqni bniedem, u mhux bhima. It-tieni, għax twieled Grieg, u mhux barbaru. It-tielet, mhux biss kien Grieg, imma filosfu wkoll.
Il-Kristjani, li huma rreġistrati fi skola aktar kredibbli, imrobbija taħt is-sorveljanza tas-Sid sovran, idawru n-nixxiegħa tal-gratitudni tagħhom f’direzzjoni oħra. Huma mbierka fi Kristu b’kull barka spiritwali fl-imkejjen tas-smewwiet (Efesin 1:3). Hi barka fiha nfisha meta jipprovaw jgħoddu barkiethom.
Talba: “Grazzi, o Alla, talli ħlaqtna skont xbihetek. Grazzi talli sejjaħtilna b’sejħa qaddisa mill-massa tal-umanità, u kkostitwejtna wliedek. Grazzi talli tajtna d-don tal-fedeltà u l-perseveranza ħalli nibqgħu naqduk il-jiem kollha t’għomorna. Grazzi talli taqleb kollox għall-ġid ulitmu tagħna. Grazzi talli wegħidtna illi għad jasal jum meta tilqagħna fid-dar eterna tiegħek, fejn naraw il-glorja tiegħek, u timsaħ kull demgħa minn għajnejna. Għandna għalfejn nirringrazzjawk tabilħaqq!”
Comments