“Għalhekk Ġesù reġa’ qal, ‘Tassew, tassew ngħidilkom, jien hu xatbet in-nagħaġ. Dawk kollha li ġew qabli huma ħallelin u briganti, iżda n-nagħaġ ma semgħuhomx. Jien hu x-xatba. Jekk xi ħadd jidħol minni se jkun salvat. Jidħol u joħroġ, u jsib il-mergħa. Il-ħalliel ma jiġix ħlief biex jisraq u joqtol u jeqred. Jien ġejt sabiex ikollhom il-ħajja u jkollhom sal-milja tagħha. Jien hu r-ragħaj it-tajjeb. Ir-ragħaj it-tajjeb jagħti ħajtu għan-nagħaġ.’...Ġesù weġibhom, ‘Għidtilkom u ma temmnux. L-opri li jien nagħmel f’isem Missieri, dawn jixhdu dwari, iżda intom ma temmnux għax m’intomx min-nagħaġ tiegħi’” (Ġwanni 10:7-11,25-26).
Kristu wettaq fidwa partikolari, mhux, kif jassumu ħafna, fidwa ġenerali għall-umanità kollha indiskriminatament. Kieku hi fidwa għall-bnedmin kollha, hi biss fidwa teoretika, bla ma attwalment issalva lil kulħadd. Aktarx, kif jagħti prova konklużiva John Owen f’waħda mit-teżijiet ewlenin tiegħu, “Kristu miet għall-magħżulin kollha t’Alla.” Kristu sofra l-għadab divin li kien dovut lill-magħżulin minħabba dnubiethom. Mhux kulħadd hu salvat bil-mewt ta’ Kristu, imma dawk kollha salvati huma salvati bil-mewt ta’ Kristu.
Hemm konkordanza ħelwa bejn il-ħidma tal-Missier u l-Iben għas-salvazzjoni tagħna. Ladarba l-Missier għażel lil dawn u mhux lil dawk għas-salvazzjoni, l-Iben ma jistax ikun li miet għal nies li l-Missier qatt ma ħatar għalih innifsu. Jekk il-Missier għażel xi wħud u mhux lill-oħrajn għall-ħajja eterna, allura jidher ċar li l-għan primarju tar-riparazzjoni ta’ Kristu kien illi jirbaħ lill-magħżulin għalih innifsu.
Dan insostnuh fi qbil max-xhieda biblika. Nisimgħu kif Kristu ħabb lill-knisja, u ta lilu nnifsu għaliha. Kienet il-knisja t’Alla li huwa xtara b’demmu stess, mhux lill-umanità kollha. Kif asserixxa hu stess, Bin il-bniedem ġie biex jagħti ħajtu bħala riskatt għal ħafna (Mark 10:45), mhux għal kulħadd. U darb’ oħra jgħid: “Nagħti ħajti għan-nagħaġ,” mentri ftit wara, fl-istess kuntest jgħid lil xi semmiegħa tiegħu, “Intom m’intomx minn nagħaġ tiegħi.”
Hawn, mela, għandna punt ta’ diverġenza bejn il-Kalviniżmu u l-Arminjaniżmu. Il-Kalvinisti jgħidu li Kristu miet biex jagħmel is-salvazzjoni attwali u ċerta għan-nies magħżula tiegħu, filwaqt li l-Arminjani jgħidu li Kristu miet biex jagħmel is-salvazzjoni possibbli għal kulħadd. Il-Kalvinisti jillimitaw l-estensjoni tas-sagrifiċċju ta’ Kristu billi jgħidu li ma japplikax għal kull bniedem. L-Arminjani jillimitaw il-qawwa tal-istess sagrifiċċju; jgħidu li fih innifsu attwalment ma jsalva lil ħadd. Għall-Kalvinist ir-riparazzjoni mwettqa minn Kristu hi bħal briġġ dejjaq li jaqsam minn naħa għall-oħra tax-xmara. Għall-Arminjan hu briġġ kbir u wiesa’ li jwassal biss sa nofs ix-xmara.
Mela ejja ma nemmnux l-evanġelju modern, li jgħid illi għandek ċans issalva. Jekk għandek ċans issalva għandek ukoll ċans ta’ dannazzjoni eterna.
Kif jgħid J.I. Packer, “Ma nkunux rajna t-tifsira sħiħa tas-salib jekk ma nkunux rajnieh bħala ċ-ċentru tal-vanġelu, flankjat minn naħa waħda bl-inabbiltà totali tal-bniedem u l-għażla bla kondizzjoni t’Alla, u fuq in-naħa l-oħra bil-grazzja irreżistibbli u l-priżervazzjoni finali tal-fidili.”
Talba: “Mulej Ġesù, int Jaħwe li ssalvana u tiġborna fi ħdanek biex hemm insibu sigurtà eterna. Int il-Ħabbej tal-maħturin t’Alla li għalihom mitt biex tqaddishom u tnaddafhom bil-ħasil tal-ilma bil-Kelma. Int il-Ħellies suprem li tagħti ħajtek għal ħbiebek. Int ir-Ragħaj it-Tajjeb li tmidd ħajtek għan-nagħaġ tiegħek, biex issalvahom mill-qirda. Lilek nattribwixxu kull mertu, u mingħandek nirrikonoxxu li nirċievu kull barka. Ilqa’ t-tifħir ta’ fommna, u l-ubbidjenza tagħna lejk bħala s-Sid ġdid tagħna.”
Comments