“O Mulej, Sid tagħna, kemm hu kbir ismek fl-art kollha! Int li qegħidt il-glorja tiegħek ’il fuq mis-smewwiet. Minn fomm it-tfal u t-trabi int ħriġt il-qawwa, minħabba l-għedewwa tiegħek, biex issikket lill-għadu u lil dak li jivvendika ruħu. Meta nħares lejn is-smewwiet tiegħek, għemil subgħajk, il-qamar u l-kwiekeb li int għamilt, x’inhu l-bniedem biex int tiftakar fih, u bin il-bniedem biex tieħu ħsiebu...O Mulej Sidna, kemm hu kbir ismek fl-art kollha!” (Salmi 8:1-4,9).
L-isem t’Alla, kif esibit fl-Iskrittura tiegħu, hu kemm isem glorjuż, mimli maestà, kif ukoll isem grazzjuż, mimli ħniena. It-titli nfushom t’Alla huma virtwalment promessi mgħoddija lil niesu. Meta hu msejjaħ xemx, tarka, torri potenti, kenn u wirt, x’ifisser dan jekk mhux illi nistgħu ngawdu fih kulma hu sinifikat b’dawn il-metafori?
It-titli ta’ Kristu l-istess: il-ħobż tal-ħajja, id-dawl tad-dinja, it-triq, i-verità, id-dielja, il-qawmien. X’inhuwa dawn jekk mhux worant għall-fidili biex, imseħbin miegħu, isarrfu s-sinifikat ta’ dawn it-tixbihat għalihom infushom?
Qis ukoll l-appellazzjonijiet tal-Ispirtu: l-Ispirtu tal-verità, tal-qdusija, tal-glorja, tal-grazzja, tas-supplikazzjoni, l-Ispirtu li jissiġilla u jixhed. B’dawn ir-rikkezzi quddiemha l-fidi tikkonkludi li hu proprjament hekk għall-avvanz u l-barka tagħna.
Ismu jwassalna biex inqimuh, għax hu manjifiċenti; ismu hu wkoll garanzija ta’ mħabbtu, għax fl-enti tiegħu hu mħabba. L-unika raġuni għala sirna reċipjenti ta’ mħabbtu hija mħabbtu. Il-kawża u l-motiv ta’ mħabbtu lejna jinsabu biss fih innifsu. M’hemm la porzjon u lanqas proporzjon fina biex jiġbdu mħabbtu lejna. M’hemm ebda attrazzjoni jew ġmiel fina li jġiegħlu merżuq wieħed ta’ mħabbtu biex jiddi fuqna.
Għax Alla hu mbierek fis-sovranità tiegħu. Ħadd mhu kompetenti biex jagħtih parir. It-tafal ma jistax jinforma lill-fuħħari. Alla hu sovran għax hu Alla; hu l-kawża tal-kawżi kollha. Is-sovranità tiegħu hi manifestata glorjożament fid-digrieti eterni tiegħu u fil-providenzi temporali. Alla jiżvela l-maestà stupenda tiegħu fl-ogħla smewwiet, il-ġustizzja terribbli tiegħu fl-Infern tal-indannati, it-treġija għarfa u setgħana tiegħu matul il-kontinenti u fuq l-oċeani; imma l-imħabba u l-ħniena, hekk ineffabbli, jinvestihom u jesibihom fil-miġemgħa tal-maħturin tiegħu hawn fuq l-art.
Talba: “O Alla nfaħħruk minħabba Ibnek Maħbub, Ġesù illi miet u issa ħdejk hu merfugħ, eżaltat fl-ogħla smewwiet. Bih għandna l-konfidenza illi nsejħulek ‘Abba, Missier.’ Bih għandna aċċess fil-preżenza tiegħek. B’ismu nappellawlek biex tagħnina b’għotjiet tajba, kif difatti tagħmek. Għax int kabbart ismek u Kelmtek fuq kollox. Ħalleluja!”
Comments