“Filwaqt li tersqu lejh, il-ħaġra ħajja – irroftata mill-bnedmin imma magħżula minn Alla u prezzjuża – intom ukoll, bħala ħaġar ħaj, qed tinbnew bħala dar spiritwali biex tkunu saċerdozju qaddis, ħalli toffru sagrifiċċji spiritwali aċċettabbli għal Alla permezz ta’ Ġesù Kristu. Għax hu kontentut fl-Iskrittura: ‘Ara, inqiegħed ħaġra f’Sijon, ġebla angolari magħżula u prezzjuża, u min jemmen fih qatt mhu se jistħi.’ Dal-valur prezzjuż, mela, huwa għalikom il-kredenti. Imma għall-miskredenti, ‘Il-ħaġra li rroftaw il-bennejja saret bħala ras il- kantuniera’ u, ‘Ħaġra ta’ tfixkil u blata t’offiża.; Jitfixklu fil-kelma għax ma jobduhiex - għal dan kienu wkoll iddestinati” (1 Pietru 2:4-8).
Il-fidili huma maħbuba bi mħabba prezzjuża, mifdija b’demm prezzjuż, imfarrġa b’wegħdi prezzjużi, u ġustifikati b’fidi prezzjuża. Iva, is-sewwa tagħhom quddiem Alla, il-qdusija, il-Ġenna, dan kollu għandna b’unjoni ma’ Ġesù prezzjuż. Bir-raġun jingħad illi dan “il-valur prezzjuż huwa għalikom il-kredenti.”
Aħna wlied il-faqar u l-afflizzjoni. Jaqaw dan hu żmien għalik meta l-ħbieb birdu u saħansitra nsewk? Ftakar li għandek Ħabib li inviżtak fl-għali tiegħek u kellmek bi kliem ta’ faraġ. Saħansitra fdiek b’demmu stess. Meta kont għadek fil-ħabs tal-ħtija u l-kundanna, fetaħlek il-kanċell u ħarġek fil-libertà. Meta kont għadek marid, ġie jarak bħala t-Tabib ta’ ruħek, u fejqek. Meta kont għarwien libbsek bis-sewwa tiegħu. Dan kollu u iżjed għamel Ġesù għalik. Uriek kif ħabib tabilħaqq iħobb f’kull żmien; hu ħuk imwieled għal żmien l-avversità (Proverbji 17:17).
Biex jassigurak illi kapaċi jsalvak kompletament, iżurek bil-fedeltà tiegħu, jibgħatlek sinjali ta’ tjieba, jimmanifestalek il-preżenza tiegħu biex ruħek tiffriska. Jhennilek qalbek u jagħti għanja ġdida fuq fommok. Hu prezzjuż għalli hu fih innifsu, għalli għamel miegħek, għalli x’qed jagħmel u x’għad jagħmillek. Għax imħabbtu lejk hi minn eternità sa eternità.
Mela kun af illi mhux se jabbandunak: int membru fil-familja tiegħu, u jara illi tasal id-dar sikur. Hu miet biex isalvana minn did-dinja ħażina u preżenti, biex jagħtina vittorja fuq id-dnub, fuq Satana u saħansitra fuq il-mewt. “Jekk xi ħadd iżomm kelmti, qatt mhu se jduq mill-mewt” (Ġwanni 8:52).
Min jista’ jgħid kemm hu prezzjuż Ġesù għall-qaddisin hemm fuq? Għalkemm għalissa naraw parzjalment u nafu parzjalment, frattant milli ngħatalna bil-fidi nistgħu naffermaw, “Ġesù hu tassew prezzjuż!”
Talba: “O Salvatur tagħna, avolja ċ-ċirkostanzi jistgħu jrossuna f’rokna, xorta waħda tibqa’ Emmanwel, Alla magħna. Fik insibu l-fidwa, ir-rikonċiljazzjoni, il-ġustifikazzjoni, il-maħfra, il-ħajja eterna, il-qdusija u l-aċċettazzjoni sħiħa tagħna ma’ Missierek u Missierna. Int kollox f’kollox għall-fidili tiegħek. Bik niftaħru; int il-konfidenza kollha tagħna. Ammen.”
Comments