“Minħabba f’hekk ngħidilkom, tinkwetawx għal ħajjitkom, x’se tieklu jew x’se tixorbu, lanqas għal ġisimkom, x’se tilbsu. Ewwilla l-ħajja mhix iżjed importanti mill-ikel, u l-ġisem mill-ilbies? Ħarsu lejn it-tjur tas-sema; la jiżirgħu, la jaħsdu u lanqas jiġbru fl-imħażen, frattant Missierkom smewwieti jitmagħhom. Ewwilla intom ma tiswewx aktar minnhom? Min minnkom, billi jinkwieta, jista’ jżid ma’ għomru mqar siegħa waħda?” (Mattew 6:25-27).
Lil Sidney Smith darba talbuh parir. Qalulu, “Aħna nixtiequ ngħaddu l-ħajja bil-ferħ u t-tama; x’imissna nagħmlu?”
Weġibhom, “Agħmlu xogħolkom fedelment, u ħudu veduti qosra tal-oqsma kollha tagħkom. Wara li tkunu pjanajtu għall-eternità billi tħabbibtu m’Alla bil-medjazzjoni ta’ Ibnu, ittawlux għenuqkom fil-bogħod wisq. Ħudu l-barka preżenti, u roddu l-ħajr f’kollox.”
Il-ħażin hu kodard perfett, u jibża’ minn kollox. Il-ħsieb t’Alla suprem iwaħħxu, għax mhux rikonċiljat miegħu, u għadu jopponih meta jaf li ma jistax iġibha żewġ miegħu. Satana jbeżżgħu wkoll; hu t-turmentatur tiegħu. Jibża’ wkoll mill-ħlejjaq t’Alla, għax dawn jingħaqdu ma’ min sawwarhom, u jissieltu kontrih. Jibża’ minnu nnifsu, għax kulfejn imur iġorr miegħu x-xilja kontrih u jservi ta’ bojja tiegħu nnifsu.
Ir-raġel konvertit, kuntrarjament, m’għandu għalfejn jibża’ minn xejn. Mhux imwaħħax minn Alla, għax jafu bħala l-aqwa ħabib, anzi, bħala Missieru, u b’ebda mod mhu se jħallih iweġġa’ apposta. Satana ma jbeżżgħux, għax ma jistax imissu. Ma jiddejjaqx bl-afflizzjoni, għax tgħallem li jintbagħtulu minn Missier għaref u beninn, li jaf b’liema ammont u sakemm imissu jkun imtaqqal, għall-ġid ultimu tiegħu. Jaf illi hemm xi ħwejjeġ tajbin iżda mhumiex pjaċevoli, bħalma huma l-għali u t-tribulazzjoni.
Id-dnub jista’ jkun pjaċevoli, iżda qatt profittabbli; l-għali hu profitabbli, avolja mhux pjaċevoli. Bħalma l-ilmijiet huma l-aktar safja meta jkunu jitħarrku, hekk il-qaddisin huma ġeneralment l-aktar ikkonsagrati għall-Mulej meta jkunu afflitti. Finalment, ma jiskansax milli jiltaqa’ miegħu nnifsu wiċċ imb wiċċ, għax il-kuxjenza tiegħu għandha s-sliem.
Talba: “Għawwimna fi mħabbtek, Missier twajjeb, biex ninħaslu minn kull koċċli ta’ biża’ mqabbad magħna. Taħt it-treġija beninna u paterna tiegħek m’għandniex għalfejn nikkonfondu u wisq inqas nitwerwru. Ħalli fina jibqa’ biża’ wieħed biss: il-biża’ li b’xi mod noffenduk. Aħfrilna d-dgħufija tagħna; saħħaħ il-biża tiegħek fi qlubna.”
Comments