“Minħabba f’hekk, mill-jum li smajna bikom, aħna ma hedejniex nitolbu għalikom u nissupplikaw ’l Alla sabiex timtlew bit-tagħrif tal-volontà tiegħu f’kull għerf u fehma spiritwali, ħalli timxu denjament tas-Sid u togħġbuh f’kull rispett billi tagħmlu l-frott f’kull opra tajba u tikbru fil-konoxxenza t’Alla; imsaħħin b’kull setgħa, skont il-potenza glorjuża tiegħu ħalli tiksbu kull perseveranza u paċenzja, u bil-ferħ tirringrazzjaw lill-Missier, li kkwalifikakom biex tixxerjaw fil-wirt tal-qaddisin fis-saltna tad-dawl. Għax ħelisna mid-dominju tad-dlam, u ttrasferiena għas-saltna tal-Iben il-maħbub, li fih għandna l-fidwa, il-maħfra tad-dnubiet” (Kolossin 1:9-14).
Mill-ħakma tad-dlam ninsabu trasferiti għas-saltna tad-dawl. Kif jista’ jkun? Kif seħħ dat-trasferiment? Il-Bibbja tagħti konsistentement tweġiba waħda: bi grazzja divina. Ġesù, fit-talba tiegħu lill-Missier, jgħid, “Għax tajtu l-awtorità fuq l-umanità kollha sabiex lil kull min tajt lilu jagħtihom il-ħajja eterna” (Ġwanni 17:2).
F’okkażżjoni oħra talab, “Niżżik ħajr, Missier, Sid is-sema u l-art, għax ħbejt dawn il-ħwejjeġ mill-għorrief u l-intelliġenti, u rrivelajthom lit-tfal ċkejknin. Iva, Missier, għax hekk għoġbok. Kollox kien kommess lili minn Missieri. Ħadd ma jaf lill-Iben ħlief il-Missier, lanqas ħadd ma jaf lill-Missier ħlief l-Iben, u dak li lilu l-Iben, jekk irid, jirrivelahulu” (Mattew 11:25-27).
X’teffettwa l-grazzja! U x’mhix kapaċi tikseb! X’inkuraġġiment ħelu għall-agħar viljakk! Ħares lejn Ġesù u ma tirgħexx. Jekk nieħdu ż-żewġ briganti misluba fuq il-Kalvarju, wieħed fuq kull naħa tiegħu, naraw x’differenza jagħmel. Wieħed minnhom, niedem, appellalu, “Sid Ġesù, ftakar fija.” Talba ħierġa minn qalb enerġizzata bil-grazzja.
It-tweġiba hi illustri. “Illum stess tkun miegħi fil-Ġenna.” Kienet il-grazzja ta’ Sidna Ġesù illi salvat dal-ħalliel, hekk illi safa tradott minn fuq salib aħrax fuq l-art għall-kuruna fil-glorja. Jista’ jkollok karattru amabbli, doċli u pożittiv, tista’ tkun persuna sewwa u ċivili: xorta waħda jeħtieġlek tħares lejn Kristu bil-fidi. Hemm fuq il-Golgota nħadmet is-salvazzjoni. Hemm biss insibu l-ftaħir tagħna. B’mewt il-Ħaruf ngħixu aħna. Il-mitluf, mimsus bis-salib, hu salvat.
Talba: “Missier smewwieti, inroddulek ħajr talli trasferejtna mid-dominju ta’ Satana għas-saltna t’Ibnek il-Maħbub. Grazzi għall-Ispirtu tiegħek li b’konvinzjoni għamilna kapaċi nafdaw fis-Salvatur Ġesù, kif ukoll jikkonformana miegħu, ħalli hekk jagħmilna preparati biex nidħlu fil-wirt etern. Ħalleluja. Ammen.”
Comments