“Il-proverbji ta’ Salamun, bin David, sultan ta’ Iżrael: biex il-bniedem jagħraf l-għerf u t-tagħlim, biex jifhem kliem ta’ dehen, biex jilqa’ tagħlim fuq l-għerf, fuq il-ħaqq, fuq is-sewwa, fuq l-onestà, biex jagħti l-għaqal lil min ma jafx, u liż-żgħażagħ tagħrif u dehen. L-għaref jisma’ u jżid fil-għerf tiegħu; ir-raġel intelliġenti jikseb pariri tajba; biex jifhem il-proverbji u t-tixbih, kliem l-għorrief, u t-taħdit mistur tagħhom. Il-biża’ tal-Mulej hu l-bidu tat-tagħlim, iżda l-boloh jistmerru l-għerf u t-twiddib” (Proverbji 1:1-7).
Mill-affarijiet ta’ did-dinja, il-ħsieb tal-Kristjan matur jintrefa’ kontinwament għall-avvenimenti futuri, in-Novissmi: mewt, ġudizzju, Infern u Ġenna. Dil-fidi li tara fil-bogħod iżżommna milli nitilfu l-perspettiva fit-tbatijiet u l-provi t’issa.
Fil-Ġenna l-indikazzjonijiet ċari huma li se jkun hemm gradijiet ta’ premji. Bħala nies konvertiti, dnubietna huma maħfura u qatt m’aħna se nsofru l-pwieni tal-Infern, madankollu xorta waħda se nieqfu quddiem Kristu f’Jum il-Ġudizzju, biex nirċievu premijiet skont ma nkunu għamilna matul ħajjitna. Dakinhar inkunu regalati b’kuruni jew inkella nġarrbu telf. Il-ħajja ta’ kulħadd se tkun evalwata: it-tajjeb premjat u l-ħażen żvelat u kkundannat.
Quddiem din il-prospettiva, Pawlu jirraġuna li, billi Alla hu tal-biża’, irridu nipperswadu lill-mitlufa biex jitilqu l-mogħdijiet midinba u jduru lejh, issa li għadu jissejjaħ il-jum. “Għax aħna lkoll jeħtieġ nidhru quddiem it-tribunal ta’ Kristu, sabiex kull wieħed jirċievi l-kumpensa għall-ħwejjeġ magħmula fil-ġisem, skont il-ħwejjeġ li jkun ipprattika, sew jekk tajjeb inkella ħażin. Mela billi nafu l-biża’ tas-Sid, nipprovaw nipperswadu lill-bnedmin” (2 Korintin 5:10-11).
Huwa lok ukoll li nwissu lil xulxin, bħala wlied Alla, biex ma nirrendux il-grazzja ineffettiva fina. “Billi nikkollaboraw m’Alla, neżortawkom biex ma tirċevux il-grazzja t’Alla fil-batal” (2 Korintin 6:1).
Dan il-ministeru għandu jkun motivat, imqanqal u mwettaq fil-biża’ tal-Mulej. Dat-tip ta’ biża’ mhuwiex ekwivalenti għal terrur u waħx ta’ kundanna eterna, imma biża’ u timenza sana u riverenti lejn Kristu, billi nafu li ma jiħux pjaċir bl-għażliet zopop li nagħmlu sakemm għadna fil-ġisem. Il-biża’ tal-Mulej huwa virtwalment sinonimu mar-reliġjon vera. Il-biża’ u l-għarfien tiegħu jimxu id f’id.
Talba: “Missierna, nosservaw kif il-ħmar jagħraf lil sidu, u t-tjur tal-passa jafu l-passaġġ tagħhom, avolja ħadd m’għallimhom. Kemm aktar aħna, bnedmin raġunevoli, messna nirrispondu għar-rivelazzjoni speċjali illi wassaltilna! F’wiċċ Ibnek Ġesù tajtna t-tagħrif salviviku tiegħek; tħalliniex, mela, inkunu kajmana jew letarġiċi fir-rispons tagħna. O li kellna nfaħħruk u nobduk, mhux b’mod erratiku, iżda regolarment u bil-ferħ, kif jagħmlu l-anġli fis-smewwiet!”
Comments