“Għaddejt ħdejn il-għalqa ta’ wieħed għażżien, u ħdejn il-qasam tad-dwieli ta’ raġel bla dehen. U ara, kiber fiha kollha x-xewk, u l-ħorrieq għattielha wiċċha, u l-ħajt tal-ġebel imġarraf. Imbagħad ħarist u qgħadt nitħasseb. Minn dak li rajt sfali tagħlim: ftit tongħos, ftit torqod, ftit idejk marbuta biex tistrieħ. Imbagħad il-faqar tiegħek jiġi fuqek bħal ħalliel, u l-bżonn tiegħek bħal wieħed armat” (Proverbji 24:30-34).
Il-kittieb jiddeskrivi l-istorja ta’ wieħed bidwi, li bil-mod il-mod beda jnaqqas minn xogħlu, sakemm l-għalqa tiegħu saret żdingata u spiċċa fqir u fil-bżonn. It-tagħlima ċara kristall. Innota x’għamel l-awtur ta’ dal-proverbju. “Imbagħad ħarist u qgħadt nitħasseb. Minn dak li rajt sfali tagħlim.” Meta ra l-għalqa mitluqa qagħad jaħseb u tgħallem li l-faqar jiġi mill-għażż.
Hekk ukoll għandna nagħmlu aħna: nispiraw ruħna mhux biss mill-eżempju tajjeb ta’ ħaddieħor, iżda nirċievu twissija saħansitra mill-ħażin ukoll. Ħalli ma nkunux boloh u nużaw l-iżbalji ta’ Kristjani oħra biex niġġustifikaw dnubna. Ma ngħidux, “Fl-aħħar mill-aħħar, mhux hekk għamel dak? Mhux kulħadd jiżbalja?” Le, minflok nitgħallmu mill-iżbalji ta’ ħaddieħor biex ma nirrepetuhomx aħna. Ngħidu, “B'dispjaċir ninnota li dak il-Kristjan dineb. Ħa noqgħod b’seba’ għajnejn biex ma naqax bħalu jien ukoll!”
Għax f’belt ta’ nies għażżiena, nippretendu biss li nsibu djar delapidati, bil-persjani maqlugħa u bibien biż-żebgħa mqaxxra, soqfa joqtru u ħitan imxaqqa. Partijiet diversi tal-għamajjar tagħhom jimtlew bil-ġrieden u l-wirdien. L-imnadar u l-ġonna nsibuhom mitluqa. It-tfal ikunu mċerċra, inkallati u bi lsien laxk; l-iskola vojta; il-ħabs imbollat; il-knisja siekta; id-dvieren storbjużi; u l-mastrudaxxa u l-ħaddied jagħmlu x-xogħol prinċipali tagħhom fil-ħwienet tax-xorb.
Xejn inqas ta’ għajb hu l-għażż lussurjuż. L-indolenza wkoll hi perikoluża ħafna għall-għonja, u dawk li ma jħossu ebda nuqqas f’dil-ħajja. Meta jintelqu għal-lassitudni, il-voluttà tegħleb ir-raġuni, u jaqgħu fin-nassa mortali u l-ingann tad-dinja. Jispiċċaw ivvalenati bi pjaċiri karnali u għaxqiet immorali, li wieħed jilgħaqhom għal staġun wieħed, iżda finalment jabbandunawhom fil-mistħija u l-konfużjoni.
Akkost ta’ kollox, wieħed irid ikun vżat dwar dan l-ażżard, sew jekk għandu ħobżu maħbuż u żejtu fil-kus, kif ukoll jekk hu b’id waħda wara u l-oħra quddiem. L-għażż, b’xi mod jew ieħor, jeħtieġ ikun espost u kkastigat. Fi żmien ir-Rivoluzzjoni Industrijali, f’Hamburg kien hemm fabbrika illi lill-ħaddiema skartaturi sabitilhom tarfhom b’mod kurjuż. L-amministraturi kienu jikkastigawhom billi jdendluhom f’qoffa fuq l-imwejjed tar-rifettorju, biex ikunu jistgħu jaraw u jxommu l-ikel provdut għall-ħawtiela, bla ma jħalluhom iduquh. Applikazzjoni oriġinali tar-regola appostolika, “Min ma jaħdimx lanqas ma jmissu jiekol”!
Talba: “Mulej, Alla tagħna, int għamiltna ħaddiema u persuni kreattivi, u f’dan is-sens nixbhuk. Tħalliniex, mela, ngħaddu mingħajr ma nkunu lieżma fis-sejħa tagħna, sew jekk naħdmu manwalment jew inkella mentalment, sew jekk nipproduċu oġġetti jew inkella noffru servizz. Nixtiequ nħallu d-dinja aħjar milli nkunu sibniha, f’ġieħ Ibnek Ġesù.”
Comments