“Lejk nerfa’ għajnejja, o int li tgħammar fis-smewwiet. Ara, bħalma għajnejn il-qaddejja jħarsu lejn id sidhom, u bħalma għajnejn il-qaddejja jħarsu lejn sidtha, hekk għajnejna jħarsu lejn il-Mulej, Alla tagħna, sakemm ikollu ħniena minna. Ħenn għalina, o Mulej, ħenn għalina, għax aħna mxebbgħin għall-aħħar bit-tgħajjir. Ruħna mxebbgħa żżejjed biż-żebliħ ta’ dawk li huma paxxuti, u bit-tgħajjir tal-imkabbrin” (Salmi 123:1-4).
Huwa adatt li aħna nitolbu għar-rilif mill-istmellija. Sakemm għandna n-nifs, huwa preġju u żina għalina li nfittxu ’l Alla għall-għajnuna u gwida. Evidentement das-salm huwa t-tnegħida ta’ wieħed (ma’ fidili sħabu oħrajn) li jinsab fl-arena, f’sitwazzjoni iebsa, imkeskes minn nies ħżiena u mgħobbi bl-istmellija u d-disgust tagħhom.
Imma Alla, li jippermetti d-dwejjaq jinvistana biex sikwit jgħammar magħna, jista’ jneħħih, isostnina taħtu jew jislet il-ġid minnu. Kif jista’ Alla jwarrab talb bħal dan, kif imlissen hawn? Alla kapaċi u difatti jintervieni. Mhuwiex limitat fl-għerf, fis-setgħa jew it-tjieba; għandu kull perfezzjoni fih innifsu. Jgħammar fis-smewwiet, frattant mhux distakkat minn uliedu. Alla hu ġentili daqskemm hu glorjuż.
Xorta waħda ma jaqbilx ninsew li, għalkemm nistgħu nipproponu ħwejjeġ sbieħ u komdi għalina nfusna, huwa l-Mulej li jiddisponi minna. Aħna qaddejja tiegħu, mhux is-sidien tagħna nfusna. Jaf jeħlisna (u jmissna nkunu konfidenti fih), imma ma jgħidilniex meta.
Allura l-mira tagħna hu dejjem illi nogħġbuh, bħas-seftura li bla protesti u bla ma tippilla, taġixxi skont l-ordni ta’ sidtha. Ir-rieda tas-Suprem tgħodd, mhux tagħna. Hekk inkunu qed nagħtu evidenza li qed inserrħu fuq il-protezzjoni tiegħu aktarx milli fuq id-driegħ tal-laħam.
“Sakemm ikollu ħniena minna.” Ċert li Alla mhux se jfallih jew jiddiżappuntah! Imma t-tiġriba tista’ tieħu fit-tul, aktar milli naħsbu. Preminentement is-salmista jixtieq ħniena minn fuq, il-balzmu veru, mhux alternattivi rħas li jinxtraw mill-vetrini tad-dinja. Fost il-midinbin, anke jekk huma midinbin niedma, l-appell għall-ħniena u l-għajta għall-grazzja qatt ma jistonaw. Sakemm indumu f’dil-ħajja qajla nistgħu nagħmlu aktar progress mit-talba tal-pubblikan. Huma x’inhuma l-ġerħiet u s-swat tal-knisja, il-miżerikordja tal-Missier hi rimedju sovran.
Il-fidili huma sikwit mgħajra u ditestati. Huma diżgustanti f’għajnejn id-dinja. Iwaħħlu tikketti fuqhom bħal “tas-setta.” Fil-provi severi tagħna, miġjuba fuqna minn bnedmin bħalna, nistgħu ndawru qalbna lejn Alla. Mill-istmellija ta’ nies mortali, naħarbu għall-kenn fil-ħniena u l-grazzja tas-Sultan etern, immortali u inviżibbli. Din fidi fil-prattika!
Talba: “Jekk u meta jien nissejjaħ għal sofferenza mentali, Missier, aktar minn qatt qabel nerfa’ għajnejja lejk, il-Pussessur tas-sema u l-art. Impossibbli nġorr toqol hekk taħħani bis-saħħa sempliċement umana. Sostnini int, għax jien nixtieq inħobbok bil-fakoltajiet kollha tiegħi, mhux biss meta faċli iżda wisq iżjed meta l-isfida tkun waħħaxija. Dan nitlobulhek għall-ġieħ ta’ Ibnek, u f’ismu. Ammen.”
Comments