“‘Dan hu dak li għandkom tagħmlu: tkellmu l-verità wieħed mal-ieħor; agħmlu l-ġustizzja fi bwiebkom skont is-sewwa, u għas-sliem. Ħadd minnkom m’għandu jaħseb ħsara f’qalbu kontra għajru, u la tħobbux il-ġurament falz, għax dan kollu nistmellu,’ jgħid il-Mulej” (Żakkarija 8:16-17).
Biex insib il-verità u nżommha bħala pendent ma’ għonqi, inkun wisq vantaġġjat jekk b’devozzjoni nitlob għaliha, għax tingħatali bħall-balzmu fuq ir-ruħ mill-Ispirtu tad-dehen, tal-fehma u t-tagħrif. Kien hemm żmien meta l-hena tiegħi niġġieled, nitmasħan u nikkontendi b’ċerta feroċità għaliha, f’disputi li sikwit ma jħallu xejn ħlief ħerba u morr. Il-kontroversji u polemiċi jkasbru r-ruħ, u jqanqlu t-torba tal-passjoni. It-talb jikkomponi l-moħħ bi ħlewwa ċelesti, u jerġa’ jlebbet l-għabra li tagħmi l-għajnejn, riżultat tal-kontenzjoni. Mhix ovvja, ewwilla, illi wieħed jara aħjar u aktar fil-bogħod f’jum diefi milli f’jum mirjieħ u msaħħab?
Jekk nitkellem falz, ikolli niddefendi kliemi. Jekk nitkellem il-verità, il-verità tiddefendi lili. Sold jiswa xi ħaġa, avolja ma jiswiex daqs lira; mela rrid inkun fidil għall-iċken verità, meta l-okkażżjoni ssejjaħ, bla ma noqgħod ngħid li hija dispensabbli. Ħa nservi lil Kristu; ħa ninstab warajh. Ħa tkun il-kawża tiegħu il-kawza tiegħi, bla ma nċedi l-iċken xagħra ta’ verità, għax il-verità mhix tiegħi, iżda t’Alla. U għalkemm fid-dinja l-verità rari tgħaddi mingħajr ma jigirfulha wiċċha, ma rridx inkun jien li nimmakkjaha. Alla għandu tliet ħwejjeġ tant għeżież għalih fid-dinja: il-qaddisin tiegħu, il-qima tiegħu u l-verità tiegħu. Diffiċli tgħid liema minn dawn hi l-egħżeż għalih.
Għalkemm il-verità hi waħda, xi aspetti minnha huma rivelati kompletament, u ma ssib ebda marka tagħha fil-ħolqien, ebda print fil-ħwejjeġ madwarna, ċoè, fl-għemejjel diversi t’Alla, biex bihom niddixxernuhom. Fost dawn insemmu l-misterji tal-vanġelu u tat-Trinità. Biss veritajiet oħra għandhom xi indikazzjoni jew għeliem fil-ħolqien innifsu, li bihom għandna indikat suffiċjentement illi mhumiex stħajjil jew immaġinazzjoni, pereżempju, illi hemm Alla.
Talba: “Mulej Ġesù, jekk ma tgħallimnix int, nibqa’ injorant. Kun int il-Profeta għalija mingħand il-Missier. Jekk ma tpattix għal dnubieti int, nibqa’ ħati, korrott u maħmuġ, taħt kundanna ċerta. Kun int il-Qassis il-Kbir tiegħi. Jekk ma tirrenjax fuqi int, nibqa’ dgħajjef u vittma tal-għedewwa spiritwali tiegħi. Kun int mela s-Sultan fuqi, biex nitgħallem nobdik u nkun protett minnek kull ħin. Ammen.”
Comments