“Min hu dak li bla għaqal jaħbi l-fehma tiegħek? Iva, jien tkellimt fuq dak li ma nifhimx; huma ħwejjeġ wisq tal-għaġeb għalija, li jien ma nifhimhomx. Isma’, nitolbok, u jien nitkellem; jien insaqsik, u int għallimni. Jien kont smajt bik b’widnejja, iżda issa rawk għajnejja. Għalhekk nistmell lili nnifsi, u nindem fit-trab u l-irmied” (Ġobb 42:1-6).
Ħa nieħu nota illi meta n-nies toppressani jew tagħmilli ħajti diffiċli, inġustament, xorta waħda hemm raġuni li tiġġustifika lil Alla biex jippermetti t-taħwid f’ħajti. Il-ġustizzja t’Alla hi esegwita fuqna bl-inġustizzja tagħhom; jekk in-nies jixluni falz, niftakar kemm Alla kapaċi jakkużani u jagħti prova ta’ ħtijieti.
Meta Ġobb kellu jittratta ma’ bnedmin bħalu sostna u ddefenda l-karattru tiegħu kontra l-baraxx ta’ kritika daparti tagħhom. “Xofftejja qatt ma jgħidu ħaġa ħażina,” argumenta magħhom, “u lanqas ilsieni ma jlissen gidba. Barra minni li nagħtikom raġun! Sa ma mmut ma nwarrabx minni l-integrità tiegħi. Mal-ħaqq tiegħi nżomm sħiħ, u ma nerħihx; qalbi ma ċċanfarnix kemm indum ħaj” (Ġobb 27:4-6).
Imma meta indirizzah il-Mulej, kemm hi differenti l-mentalità tiegħu! X’bidla radikali naraw fih! Quddiem il-Ħallieq u d-Diriġent tal-univers, li jżomm f’idu lil Orjone u l-Plejadi, quddiem il-Qaddis, li mqar l-anġli mhumiex safja f’għajnejh, il-patrijarka jobżoq dnubu, u ma setax jiġġustifika lilu nnifsu. Flok ma argumenta u rraġuna, issuplika. “Ara, jien ma jien xejn; x’nista’ nwieġbek?” jgħidlu. “Inqiegħed idi fuq fommi. Darba tkellimt, u ma ntennix; iva, darbtejn, u ma nżidx aktar” (Ġobb 40:4-5). Evidentament il-ġust, issa midrub, tgħallem xi ħaġa!
John Bunyan kien jaf intimament x’jiġifieri moħqrija inġusta. Ħallielna dal-ħsieb: “Ewwilla dawk il-ħwejjeġ li huma l-aktar morri għan-natura karnali tagħna m’għandhomx ħabta jqanqlu lill-Kristjani għall-fidi u t-talb, u fl-istess ħin jaraw il-vojtezza ta’ did-dinja, u t-transitorjetà tal-ifjen affarijiet prodotti minnha? Jaqaw Alla, b’dawn it-tbatijiet, ma jsejjaħx sikwit lil dnubietna biex niftakruhom, u jipprovokana biex namendaw ħajjitna? Kif mela nistgħu nkunu offiżi b’inċidenti li bihom naħsdu tant għelejjel ta’ ġid?...
“Għaldaqstant, jekk l-għadu tiegħi jġuħ, nitimgħu; jekk jaqbdu l-għatx, nagħtih jixrob. Issa biex nagħmlu dan, irridu l-ewwel nilmħu l-ġid f’dak li ħaddieħor ma jara ebda ġid. It-tieni, irridu noqtlu kull sens ta’ vendetta, u naħfru l-weġgħat li nies oħra jiddeterminaw illi jpattuhom.”
Talba: “Missier twajjeb u għaref, ħa nuru illi realment u attwalment irċevejna l-grazzja mingħandek. Int ikkostitwejtna biex nissaportu dak li ħaddieħor mhuwiex midħla tiegħu. Għallimna biex nirrealizzaw illi bosta mill-grazzji tagħna huma miżmuma ħajjin b’dawk l-istess affarijiet li jservu ta’ mewt għall-infidili.”
Comments