“Imbierek ir-raġel li jissaporti fit-tiġrib, għax meta jkun għadda mit-test, se jirċievi l-kuruna tal-ħajja li s-Sid wiegħed lil dawk li jħobbuh. Meta jkun imġarrab, ebda wieħed m’għandu jgħid, “Qed niġġarrab minn Alla,” għax Alla ma jistax jiġġarrab bil-ħażen, u hu nnifsu ma jġarrab lil ħadd. Imma kull wieħed hu mġarrab meta hu miġbud u lliskat mil-leblibiet ħżiena tiegħu stess. Imbagħad il-leblieba, meta tkun ikkonċepiet, tiled id-dnub; u d-dnub, meta jkun kiber għalkollox, iferraħ il-mewt” (Ġakbu 1:12-15).
Ix-xitan iġarrab, sabiex jingannana u nitkissru; Alla jippermettielna nkunu mġarrba, biex jipprovana u jsaħħaħna. It-tentazzjoni hi bħal sikkina, li biha tista’ taqta’ l-laħam fil-platt, jew inkella tiskarna bniedem; tista’ tkun l-ikel jew il-valenu tiegħek. It-tentazzjoni hi l-prova tas-sinċerità tagħna. Kull darba li ngħaddu minnha niksbu aktar esperjenza imprezzabbli, li altrimenti nibqgħu mingħajrha, u allura foqra. Bħalma l-qari jimlina, u t-talb iqaddisna, it-tiġrib jagħnina fil-karattru. Meta niltaqgħu mat-tiġrib, għall-ewwel jidher qisu l-iljun li qabeż fuq Sansun; imma jekk negħlbuh, id-darba li jmiss niskopru xehda għasel fih.
Satana, bħal sajjied, jilliska s-sunnara skont l-aptit tal-ħuta. Imma f’pajjiż fejn saltnet Kristu qabdet sew, sikwit Satana jġarrab bil-pretest tar-reliġjon. Għandna noqogħdulu l-aktar attenti meta jittrasforma lilu nnifsu f’anġlu tad-dawl. Lejn Ġesù, wara sawma ta’ erbgħin jum, resaq bl-Iskrittura fuq fommu, “Hu miktub.”
Jinqeda bir-reliġjon biex ibegħidna minn Kristu, jisseparana minn mar-ras. Iġarrab bosta rġiel, pereżempju, għar-rgħiba bl-iskuża illi jridu jipprovdu għall-familji tagħhom. Fuq kollox iġarrab nies familjari mal-evanġelju, mingħajr għadhom ma jemmnuh, billi jħajjarhom jgħixu tajjeb, jafdaw fit-tjieba tagħhom infushom, u jraqqadhom f’sens ta’ sigurtà falza, għax difatti ebda bniedem ma jista’ jkun ġustifikat bl-għemil tal-liġi, għax hu miktub, “Il-bniedem ġust se jgħix bil-fidi” (Galatin 3:11).
Minkejja l-istrataġemmi djaboliċi, ultimament naqgħu għax irridu. Indubjament mexxejja għat-tentazzjoni għandna, imma hija ħtija tagħna meta nċedu. Biex nobżquha bla ma noqogħdu nomogħduha, aħna spiss inġarrbu lilna nfusna. Satana ċertament mhuwiex l-unika kawża għall-ħażen. In-nassab jifrex it-trabokki u jsaffar bħall-għasfur; iżda jagħmel x’jagħmel ma jistax iġiegħel lill-għasfur itir għal ġot-trabokk. L-għasfur imur għax irid; imħajjar, iva, imma t-tajran tiegħu.
Hemm dispożizzjoni sigrieta fi qlubna lkoll, għad-dnub; imħollijin waħidna, nixorbuh bħall-ilma. Ix-xitan iġarrab, imma l-leblieba tagħna tiġbidna. Kieku m’għandniex widnejn jitgħarrxu u affezzjonijiet flessibbli, is-sireni jgħannu għalxejn. Ix-xitan, mela, ma jista’ qatt jirrovina bniedem mingħajr il-kunsens tal-bniedem, imma bniedem jista’ faċiment jirrovina lilu nnifsu mingħajr Satana.
Kif nistgħu negħlbu u ngawdu l-vittorja miksuba għalina fuq il-Kalvarju? Is-sigurtà tagħna tinsab filli nirreżistu. “Irreżistu lix-xitan, u jaħrab minnkom” (Ġakbu 4:7). Il-kap kmandant tal-eżerċtu tal-Mulej forniena b’armatura biex tiddefendina aħna u nissieltu, imma ma tana xejn fil-każ li naħarbu mill-posta tagħna u nkunu rinnegati. Ħa nikkonsidraw ukoll, kif Satana ta tuffieħa lil Adam, biex ħadlu l-Ġnien tal-Għeden. Mela f’tiġribna kollu huwa imperattiv inqisu, mhux x’qed joffrielna, iżda x’se nitilfu.
Talba: “Nixtiequ nkunu kkonformati max-xbieha ta’ Ibnek, Missier qaddis. Aħfrilna meta nogħtru. U meta nittradixxu lil Sidna billi niżvijjaw mit-triq, jew nisfaw xkanati b’tiġrib vjolenti, ħa nfittxu b’urġenza l-indiema, ir-rikoverta mill-waqgħa bi stqarrija sinċiera, u riforma istantanja, f’ġieħ Ibnek, is-Sultan tagħna. Ammen.”
Comments