“Mhux lill-anġli ssuġġetta d-dinja li ġejja, li dwarha qed nitkellmu. Anzi, xi ħadd attesta x’imkien, billi qal: ‘X’inhu l-bniedem biex tiftakar fih? Jew bin il-bniedem biex tinsab ikkonċernat dwaru? Għamiltu xi ftit ibax mill-anġli; inkurunajtu bi glorja u b’unur. Kollox issottomettejt taħt saqajh.’ Filli ssottometta għalih il-ħwejjeġ kollha, Alla xejn ma ħalla insubordinat għalih. Frattant għalissa għadna m’aħniex naraw il-ħwejjeġ kollha suġġetti għalih. Imma naraw lil Ġesù, li kien magħmul għal xi ħin ibax mill-anġli, issa inkurunat bi glorja u b’unur minħabba s-sofferenza tal-mewt, ħalli bil-grazzja t’Alla jduq mill-mewt għal kulħadd” (Ebrej 2:5-9).
Ġesù huwa merfugħ fl-ogħla maestà, irregalat b’ġieħ u glorja minħabba li sofra l-mewt għan-nom tagħna. Il-manswet hu l-maestuż, l-umiljat eżaltat. Il-qaddej hu difatti rjali. Inħarsu lejh u nifhmu kull paradoss evanġeliku, u jdawlilna d-dlam tagħna. Iniżżilna miegħu sal-wied tal-viżjoni, biex aħna u ngħammru fl-għamiq nammirawh fil-għoli, għax “ħadd ma tela’ fis-sema ħlief dak li niżel mis-sema – Bin il-Bniedem” (Ġwanni 3:13). Iġegħilna nħossu dnubna biex napprezzaw il-maħfra tiegħu. Jagħmel li l-ħtija tagħfas fuqna biex nithennew bil-ġustifikazzjoni miksuba b’demmu.
Bħala l-Imgħallem, jgħallimna bil-paradoss, għax hu nnifsu l-Paradoss f’dinja antitetika għalih. Jurina kif it-triq għan-niżla hi t-triq għat-telgħa, l-umiljazzjoni hi l-eżaltazzjoni, il-qalb maqsuma hi l-qalb mfejqa u stabbli, l-ispirtu mnikket hu l-ispirtu tal-ġublew u ċ-ċelebrazzjoni, ir-ruħ niedma hi attwalment ir-ruħ vittorjuża.
Jikkonvinċina b’sengħa eterna illi meta m’għandna xejn nippossiedu kollox. Meta nġorru s-salib qegħdin nitħarrġu biex nilbsu l-kuruna. Meta nagħtu nirċievu. Meta naslu fl-ifnad parti tal-wied inkunu kwalifikati għall-viżjoni beatifika.
Jistedinna biex fid-dalma tagħna nsibu d-dawl tiegħu, f’mewtna l-ħajja tiegħu, fil-vistu l-kumpanija tiegħu, fid-dnub il-grazzja tiegħu, fil-povertà tagħna r-rikkezzi vasti tiegħu. Dan hu Alla Sidna, il-Paradoss spjegat għall-inizjati, ċoè, għal kull min jafda fih.
Talba: “Mulej Ġesù, int ġejt bħala dawl fid-dinja biex kull min isegwik żgurament ma jibqax fid-dalma, anzi jingħatalu dawl il-ħajja. Poġġejtna fid-direzzjoni t-tajba; tajtna t-tagħrif t’Alla ħaj u veru. Avolja ma nifhmux kollox, nitolbuk biex inkomplu nafdaw fik, u tkompli tgħarrafna l-għoli u l-fond u l-wisa’ u t-tul ta’ mħabbtek lejna, bil-maħfra tad-dnubiet u s-supremazija ħelwa tiegħek fuqna.”
Comments