“Tkunux mela partiċipanti flimkien magħhom, għax darba kontu dlam, imma issa intom dawl fis-Sid. Imxu bħala tfal tad-dawl (għax frott id-dawl jikkonsisti f’kull tjieba, ġustizzja u verità) u provaw skopru x’inhu dak li jogħġob lis-Sid. Tixxirkux fl-għemejjel bla frott tad-dlam, imma aktarx esponuhom, għax hu għajb imqar meta titkellem dwar il-ħwejjeġ li jsiru segretament minnhom. Imma l-ħwejjeġ kollha esposti mid-dawl isiru viżibbli, għax huwa d-dawl li jagħmel kull ħaġa viżibbli. Għaldaqstant tgħid: ‘Stenbaħ, ja rieqed, qum mill-imwiet, u Kristu jiddi fuqek’” (Efesin 5:7-14).
Pawlu jamplifika fuq xi kwalità ta’ mixja, jew komportament, il-knisja obbligata tadotta tul il-pelleġrinaġġ tagħha. Hi mixja denja tas-sejħa tagħna, fl-unità u s-sliem, mixja ta’ bniedem ġdid, mixja fl-imħabba, u issa mixja fid-dawl, li huwa s-simbolu tal-qdusija.
Jadotta linja ta’ argument simili għal qabel. “Darba...imma issa!” Il-Mulej irid mhux biss nastienu mid-dnubiet li inevitabbilment iqanqlu d-dispjaċir u l-korla t’Alla (li ma jistax jagħmel kompromessi mad-dnub), imma aktar minn hekk, jurina d-dmir sagrosant tagħna li ngħixu bħala “wlied id-dawl.” Ladarba dawl, nimxu fid-dawl. Ladarba meħlusin, ingawdu l-ħelsien. Dal-lingwaġġ ifakkarna fis-salvataġġ sopranaturali ta’ Iżrael, l-ewwel mill-jasar Eġizzjan u aktar tard mill-kaptività f’Babel.
L-Iskrittura tpenġi l-umanità, barra l-grazzja fi Kristu, bħala suġġetta għal qawwet id-dlamijiet, il-ħakma tirannika ta’ Satana. Il-fidili huma emanċipati mill-ordni ta’ did-dinja preżenti, u miġjuba taħt id-dominju u l-protezzjoni ta’ Bin Alla.
Il-metafora tad-dawl hi adatta immensament hawnhekk. Band’ oħra Pawlu jitkellem dwar id-dawl tal-evanġelju li jiddi fid-dlam u jippenetra l-għama ta’ dawk li jinsabu fit-triq wiesa’ tat-telfien.
Bħala riżultat tal-unjoni tal-fidili ma’ Kristu, “id-dawl tad-dinja” (Ġwanni 8:12), issa aħna li nsegwuh sirna, f’sens sekondarju u derivattiv, “id-dawl tad-dinja” wkoll (Mattew 5:14) – id-dawl rifless tiegħu fuqna.
Min għandu bżonnu d-dawl? Kristjan matur diġà qed jimxi fih, u hekk imissu jkompli jagħmel. Imma d-dawl jeħtieġu wkoll dak il-Kristjan li forsi għadu qed jikkomprometti ruħu, u jimxi fil-penumbra. “Stenbaħ, ja rieqed, qum mill-imwiet, u Kristu jiddi fuqek” (Efesin 5:14).
Dan kmand. B’daqshekk mhuwiex implikat li l-bniedem kapaċi jobdih, imma għax huwa d-dover tiegħu. Biss meta aħna konvertiti lejn il-Mulej insibu s-setgħa u l-motivazzjoni fih biex niskopru dak li jaqla’ l-approvazzjoni tiegħu. Fl-istess ħin nidentifikaw, nesponu u nikkundannaw l-opri inutli u bla siwi, ta’ ħsara u dannu għar-ruħ.
Vokazzjoni tremenda! F’das-sens ninfirdu mill-infidili: mhux fiżikament (Kristu kien jagħmilha mal-pubblikani u n-nisa tat-triq), imma moralment.
Talba: “Tħallinix nongħos jew saħansitra norqod għar-realtà spiritwali, okkorrenza pjuttost komuni. Ħa tkun il-grazzja tiegħek kompletament operattiva fija, biex mejjet għad-dnub, ngħix għalik, Mulej. U nitolbok ukoll għal dawk mhux riġenerati, li għadhom fil-kalzri. Ibgħatilhom id-dawl; ibgħatulhom permezz tiegħi. Ammen.”
Comments