“‘La tibżax, għax int ma jkollokx mniex tistħi, u lanqas tħoss ruħek umiljata, għax ma jkollokx mniex tiħmar, għax int tinsa għajb żgħożitek u ma tiftakarx iżjed fiż-żebliħ ta’ meta kont armla. Għax min għamlek hu żewġek, il-Mulej tal-eżerċti hu ismu, u l-Feddej tiegħek hu l-Qaddis ta’ Iżrael, Alla tal-art kollha ismu. Għax il-Mulej sejjaħlek, bħal mara mitluqa u mnikkta fl-ispirtu, bħal mart iż-żgħożija meta hi mkeċċija,’ jgħid Alla tiegħek. ‘Għal ħin wieħed tlaqtek, iżda bi ħniena kbira niġbrok. F’fawra ta’ għadab ħbejt għal ftit wiċċi minnek, iżda bi ħniena għal dejjem nitħassrek,’ jgħid il-Feddej tiegħek, il-Mulej” (Isaija 54:4-8).
Qatt m’għandna raġun nogħxew, inkunu skuraġġiti jew mormija. Il-Mulej jingħad li jitlaq jew jabbanduna lil uliedu fir-rigward tas-setgħa jew il-grazzja tiegħu, jew fir-rigward ta’ sentimenti konfortabbli ta’ mħabbtu, kemm fir-rigward ta’ unjoni jew inkella fir-rigward ta’ viżjoni.
Issa inkwantu l-unjoni tagħna miegħu, ma jitlaqna qatt, għax dir-rabta ma tinħallx; hi sikura u infallibbli. Inkwantu l-qawwa jew il-grazzja tiegħu, qatt ma jitlaqna totalment. U inkwantu l-viżjoni, jew sentimenti konfortabbli, għalkemm jista’ jitlaqna għal xi perjodu, frattant jirritorna lejna.
Ladarba dan minnu, għalfejn għandna niskuraġġixxu rwieħna? Nistgħu nkunu kkonsidrati bħala nagħaġ meħudin għall-biċċerija, iżda difatti l-fidili huma aktar minn rebbieħa, bi Kristu. Dwar ir-rabta tagħna miegħu, Pawlu jsemmi lista sħiħa ta’ perikli li forsi jistgħu jifirduna minn Alla u mħabbtu, izda xejn u ħadd ma jikkwalifika. “Għax jien persważ,” jgħajjat, “illi la l-mewt, u lanqas il-ħajja, la l-anġli u lanqas il-prinċipati, la s-setgħat u lanqas il-ħwejjeġ t’issa, la l-ħwejjeġ li ġejjin, u lanqas l-għoli, la l-għammieq, u lanqas l-ebda kreatura oħra, ma tkun tista’ tifridna mill-imħabba t’Alla, li hi fi Kristu Ġesù Sidna” (Rumani 8:38-39). Lil dawk li jħobb bi mħabba salvivika, iħobbhom sat-tmiem, sal-perfezzjoni (ara Ġwanni 13:1).
Inkwantu l-qawwa u l-grazzja tiegħu, nafu x’wegħidna, “Żgurament mhux se nħallik, lanqas qatt mhu se nabbandunak” (Ebrej 13:5). Aħna miżmumin bl-omnipotenza tiegħu permezz tal-fidi għas-salvazzjoni finali (1 Pietru 1:5).
Inkwantu s-sentimenti konfortabbli, il-promessa tiegħu hi hekk: “Għal ħin wieħed tlaqtek; iżda bi ħniena kbira niġbrok.” Il-ħbieb ma tantx iġibuha bi kbira jekk ikunu se jinfirdu għal żmien qasir biss, għax jafu li għad jerġgħu jiltaqgħu. Jekk il-Mulej iwarrabna għal ftit, ma nistgħux ngħidu, “Mhux se narawh iżjed,” għax għad jirritorna, u miegħu jġibilna barkiet multiplikati. L-intenzjoni tiegħu hi waħda tfawwar bl-imħabba, mhux b’inkejja jew kapriċċ. Issa ladarba din l-esperjenza hi biss temporanja, m’għandniex għalfejn inkunu skuraġġiti.
Talba: “Mulej sovran, int tinsab fil-għoli u merfugħ; l-anġli tiegħek jgħattu wiċċhom quddiemek, u l-preżenza tiegħek timla s-smewwiet u l-art. Int trieġi u taħkem bil-providenza assoluta tiegħek. Għallimna nafdaw fik fid-dawl u d-dlam, fil-ħelu u l-morr, fil-wati u l-imħarbat, kif inhu xieraq. Ammen.”
Comments