“Peress li għandna l-istess spirtu tal-fidi, skont x’hemm miktub: ‘Emmint, konsegwentement tkellimt,’ aħna wkoll nemmnu, u konsegwentement nitkellmu, billi nafu illi dak li qajjem lis-Sid Ġesù mill-mewt għad iqajjem ukoll lilna flimkien ma’ Ġesù u jippreżentana magħkom fil-preżenza tiegħu. Għax infatti l-ħwejjeġ kollha huma minħabba fikom, sabiex il-grazzja li qed tilħaq aktar u aktar nies tkattar ir-ringrazzjament għall-glorja t’Alla. Konsegwentement ma naqtgħux jiesna. Għalkemm il-bniedem esterjuri tagħna qed jitħassar, madankollu l-bniedem interjuri tagħna qed ikun imġedded jum wara jum. Għax l-afflizzjoni leġġiera u mumentanja tagħna qed tipproduċi għalina toqol etern ta’ glorja ’l hinn minn kull paragun, filwaqt li aħna nixħtu l-attenzjoni mhux lejn il-ħwejjeġ viżibbli, iżda lejn il-ħwejjeġ inviżibbli. Għax il-ħwejjeġ viżibbli huma temporanji, imma l-ħwejjeġ inviżibbli huma eterni” (2 Korintin 4:13-18).
Pawlu jurina u jipperswadina, bħala ħutu fil-Mulej, li ninsabu f’linja ta’ xhieda fidili, aduraturi t’Alla reali bla ma josservawh b’għajnejhom. Iżid jgħid li m’għandniex naqtgħu qalbna minħabba l-ostakli quddiemna; il-fidi tagħna ssostnina bħalma sostniet lil ta’ qabilna. Nemmnu bħalma emmen Pawlu, li kien motivat mill-istess ħarsa ta’ fidi bħal David, li kiteb Salm 116:10, bħal Abraham u Abel.
X’nemmnu? Sewwa sew nemmnu f’Alla, u kulma qalilna; nemmnu fl-għan etern tiegħu; fir-rovina totali u l-inabbiltà tal-bneidem li jinsab f’apostasija mill-Ħallieq; nemmnu fil-missjoni ta’ salvataġġ fl-Iben divin, li sar inkarnat, u offra sagrifiċċju wieħed għat-tneħħija tad-dnub u l-ġustifikazzjoni tagħna. Nemmnu fil-qawmien fl-aħħar jum. Dan mhu essenzjalment xejn differenti mill-fidi tal-antenati tagħna. Il-fidi Kristjana għandha għeruqha fi żmien żemżem: mhix novità, u allura hija kritika redikola u bla ħsieb meta jgħajruna, ‘Intom ġejjin minn Neriku VIII!’ jew, ‘Fejn kontu qabel Luteru?’
Nammettu liberament, il-ħajja fil-knisja ħadet żvolta ġdida mir-Riforma ’l hawn, imma nħaddnu l-istess vanġelu appostoliku, proklamat minn qabel mill-ispirtu profetiku. Bl-istess spirtu ta’ fidi nesprimu ruħna, bla mistħija, riżerva jew intimidazzjoni. Il-qaddisin qabilna huma ispirazzjoni għalina, u jinkuraġġuna niftħu fommna favur Ġesù l-Mulej.
Indubjament se nkunu konfrontati b’theddid, saram u reżistenza determinata, imma ninsabu ċerti mir-rebħa aħħarija. Ma nċedux, għax il-fidi tagħna mhix imsejsa fuq ħrejjef jew mitoloġija, lanqas fuq gideb jew esperjenza instabbli ta’ mħuħ fanatiċi u sħan.
Talba: “Agħtina l-konfidenza meħtieġa, Missier, biex ma nitwarrbux fil-ġenb iżda nissoktaw niġru t-tiġrija tal-fidi, b’ħarsitna msammra fuq il-Pijunier u l-Perfezzjonatur tal-fidi tagħna. Urina kif m’għandniex għalfejn nibżgħu la tul il-ħajja u lanqas quddiem il-mewt. Ħalli l-fiduċja tagħna tibqa’ tixgħel sal-aħħar, aktar u aktar meta nafu illi avolja jkollna nbatu, wegħidtna illi għad ikunu glorifikati ma’ Ibnek, il-Feddej tagħna.”
Comments