“Il-baħar ra dan u ħarab; il-Ġordan reġa’ lura. Il-muntanji qabżu bħal kbiex, u l-għoljiet iż-żgħar bħal ħrief. X’ħassejt, ja baħar, biex ħrabt? U int, Ġordan, għaliex erġajt lura? U intom muntanji, għaliex qbiżtu bħal kbiex, u intom għoljiet żgħar bħal ħrief? Triegħed, art, quddiem is-Sid, quddiem Alla ta’ Ġakobb, li jbiddel il-blat f’għadira ilma, u ż-żniet f’għajn tal-ilma” (Salmi 114:3-8).
Alla feda l-poplu Iżraelita biex il-poplu jsir tiegħu, santwarju għalih u demanju tiegħu. Immanifesta l-preżenza tiegħu fosthom. It-tabernaklu, u aktar tard it-tempju, servew bħala simboli tal-preżenza tiegħu; mill-Qaddis tal-Qaddisin iddiet ix-Xekina, il-kolonna glorjuża ta’ dawl mis-sema.
Meta Alla jibda jagħmel il-ġid għal ruħna, ikomplih u jipperfezzjonah. Ma jħallix xogħlu bħall-Erbgħa fost il-ġimgħa. Is-salm kollu hu prova ta’ dan. It-tfixkil (li fis-salm ma jissemmiex) huwa biss in-nuqqas ta’ fidi. Imma Alla hu marbut bil-patt u l-ħalfa li jibqa’ jagħmlilna l-ġid il-jiem kollha ta’ ħajjitna. L-ingaġġiment tiegħu ma jistax ifalli, minkejja r-rispons fqir u ingrat tagħna. Il-provvediment t’Alla f’Kades hu wirja tal-qawwa u l-kumpassjoni tiegħu.
Meta nikkonsidraw kemm hu glorjuż Alla u kemm huma meraviljużi l-perfezzjonijiet tiegħu, m’għandniex għalfejn inkunu sorpriżi bir-riżultati stupendi prodotti mill-preżenza manifestata tiegħu.
Meta Alla jeħles lil niesu, ebda oppressjoni ma tista’ tfixkel. La jippossedihom b’dak li jkun wegħidhom, ebda impediment ma jista’ jopponih, lanqas it-tirannija tal-mewt. Fil-mixja u l-avvanz tal-knisja ebda poter ma jista’ jiqfilha hekk li jarresta ħidmet Alla.
Ladarba l-Mulej waqqaf l-ilmijiet tal-Ġurdan biex niesu jaqsmu għan-naħa l-oħra, u jippossiedu l-Art Imwiegħda, bl-istess mod jinnewtralizza l-kurrent tal-mewt biex niesu ma jinġarrux minnu. Ċertament jiftħilna passaġġ sikur biex nidħlu fil-wirt tas-sema.
Iva, evidentement għandna tama invinċibbli għall-futur. Każ brillanti ta’ meta “l-investiment jista’ biss jogħla, u l-passat hu garanzija tal-futur.” Mar-riġenerazzjoni ngħaddu għat-taqdis, u t-taqdis hu l-mogħdija għall-glorifikazzjoni; minn bidu tajjeb għall-tmiem aħjar. “Alla ta’ Ġakobb” hu favur tagħna. Ladarba Alla hu magħna, min jista’ jkun kontra tagħna?
Talba: “Mulej setgħani, aħna nirraġunaw illi jekk il-preżenza divina tħalli effett hekk tremend fuq ħwejjeġ inanimati, kif imissha topera fuq bnedmin razzjonali u kontabbli lejk? Ħa nibżgħu, b’timenza qaddisa, fil-preżenza tiegħek, fid-dinja bil-providenza tiegħek, u fil-kuxjenza tagħna bl-Ispirtu tiegħek, sabiex hekk ikollna tama u kuraġġ fil-jum meta tqum biex theżżeż l-art terribbilment. Ammen.”
Comments