“X’ħa ngħidu mela għal dan? Jekk Alla favur tagħna, min jista’ jkun kontrina? Hu li ma ffrankahiex lil Ibnu stess, anzi ċedieh għalina lkoll, kif mhux se jagħtina liberament ukoll miegħu l-ħwejjeġ kollha? Min se jġib xi akkuża kontra l-magħżulin t’Alla? Alla hu dak li jiġġustifika. Min hu li jikkundanna? Kristu Ġesù, li miet – u aktar minn hekk, hu rxoxtat għall-ħajja – hu fuq il-leminija t’Alla, u qiegħed ukoll jinterċiedi għalina” (Rumani 8:31-34).
Fl-għamla tagħha din mhix wegħda diretta, imma fil-fatt hi. Anzi, tiġbor fiha iżda minn wegħda waħda: hi ħażna sħiħa ta’ wegħdi. Hi munzell ta’ żmeraldi, djamanti u rubini, interzjat fi gwarniċ tad-deheb. B’din il-mistoqsija rettorika, Pawlu jisfidana biex ma nkunux iżjed ansjużi.
X’jista’ jiċħdilna l-Missier, jekk diġà tana b’xejn l-aħjar, l-eqreb u l-egħżeż li għandu, lil Ibnu l-waħdieni stess? Jekk ikollna bżonn il-ħwejjeġ kollha fis-sema u fl-art, jirregalahomlna. Kieku Alla ried ipoġġi xi limiti fuq imħabbtu favur tagħna, ma kienx jasal biex jagħtina lil Iben uniġenitu tiegħu.
Xi rrid illum? Jeħtieġ biss nitlobha. Jista’ jkun li jkolli nitlob bil-perseveranza u ħeġġa sħiħa, iżda m’għandix għalfejn nuża pressjoni, bħallikieku l-Mulej se jagħtini għotja kontra r-rieda tiegħu. Il-Mulej jagħtina b’xejn. Mingħajr ħadd ma ġiegħlu, tana lil Ibnu. Ċertament ħadd ma kien jissupponi jew jimmaġina t-tali għotja mingħandu. Ħadd ma kien jissogra jitlob għotja eċċezzjonali bħal din. Ħadd ma kien se jkun daqshekk prużuntuż. Tana b’xejn l-Iben il-waħdieni tiegħu.
Ruħ tiegħi, m’intix tafda ’ll-Missier tas-sema biex jagħtik kwalunkwe ħaġa? It-talb fqajjar tiegħek ma kien ikollu ebda forza quddiem Alla omnipotenti kieku hemm bżonn il-forza. Iżda l-mħabba, bħall-molla, togħla minnha nfisha, u tfur biex tissupplixxi ħtiġijietek kollha.
Talba: “Abba Missierna, b’liema feliċità tfawwar qlub uliedek! B’liema beatitudni żżejjen ir-ruħ tagħna! Darba konna bħal trabi mormija, u int għaddejt minn ħdejna u għidt, “Għixu!” Fejjaqtna u libbistna lbies ta’ żina. U avolja nqasniek bqajt tħobbna, għax imħabbtek hi tabilħaqq invinċibbli. Bħalma ġbidtna lejk, hekk ibqa’ żommna. ħalli hekk nagħrfu l-assigurazzjoni ta’ tamitna. Ħalleluja!”
Comments