“L-għaqli jagħmel kollox bil-ħsieb, iżda l-iblah jifrex bluhitu. Il-bniedem prudenti jaħbi għerfu, iżda qalb il-boloh ixxandar bluhithom. Għerf l-għaqli hu li jifhem triqtu, iżda l-bluha tal-boloh qerq. Min moħħu dgħajjef jemmen kollox, iżda r-raġel għaqli jqis il-mixi tiegħu. L-iblah ma jqisx twiddib missieru, iżda min jilqa’ t-twissija għaqli. Il-bniedem għaqli jara ġej l-għawġ, u jinħeba, iżda dawk li moħħhom dgħajjef jibqgħu sejrin u jkunu kkastigati” (Proverbji 12:23; 13:16; 14:8,15; 15:5; 22:3).
Fil-knisja kultant nipparteċipa f’xi diskussjoni fuq xi punt ta’ teoloġija jew morali. Niskanta kif drabi minnhom xi ħadd, normalment Kristjan immatur, jasal għall-konklużjoniiet li nassigurakom l-awqa teologi tal-knisja jammettu li m’għandhomx tweġiba ċara.
Jekk int wieħed li lsienek jaħrab bik, tgħallem kun prudenti; aħbi dak li taf. Tiddandanx bil-livell akkademiku tiegħek. Meta Lord Bacon sema’ lil Sir Edward Cooke jiftaħar bih innifsu, qallu, “Inqas ma tirreklama l-kobor tiegħek, aktar naħseb dwaru.” Il-mirjiet huma l-akkumpanjamenti tal-elegantuni, mhux tal-eroj. L-irġiel ta’ stoffa li jżenju r-rakkont tal-ġrajja tal-ġens uman ma ħlewx ħinhom jiċċassaw lejn il-mera biex jassiguraw irwieħhom mill-istatura tagħhom. Assorbiti f’xogħolhom, wettquh. Wettquh b’eċċellenza u d-dinja mmeraviljat ruħha kif rathom daqshekk kbar. Għaldaqstant tathom it-tikketta ta’ nies kbar, eroj taċ-ċiviltà.
John Newton, sobriju u sensibbli, qal, “M’inix dak li suppost jien, m’inix dak li nixtieq inkun, m’inix dak li nittama li għad inkun, iżda bil-grazzja t’Alla m’inix dak li kont.”
Talba: “Rażżanni, ja Sidi, milli nkunu prużuntuż, ħsiebni biex nirreklama lili nnifsi. O kieku nitgħallem ninħeba warajk: int l-Imgħallem, jien sempliċi serv tiegħek. Aħfirli l-ardità, it-tostaġni, is-suppervja sigrieta, l-atteġġjament medjokri, u kull vizzju li jgħaddasni fil-ħama minflok ma ngawdi r-relazzjoni miegħek kif tixtieqha int.”
Comments