“Il-mibegħda tqajjem il-ġlied, iżda l-imħabba tgħatti l-ħtijiet kollha. Il-ġlied jiġi biss mill-kburija, iżda l-għerf qiegħed ma’ dawk li jieħdu parir. Raġel mgħaddab ixewwex il-ġlied, iżda min ma jagħdabx malajr isikket it-tilwim. Raġel kattiv iqajjem il-ġlied, u wieħed li jagħti l-malafami jifred l-aħjar ħbieb. Aħjar loqma ħobż iebsa u l-kwiet magħha minn dar mimlija ikel u ġlied. Bħalma l-faħam għall-ġamar, u l-ħatab għan-nar, hekk il-ġelliedi biex ikebbes il-ġlied” (Proverbji 10:12; 13:10; 15:18; 16:28; 17:1; 26:21).
Kollox jissewwa, imma hawn min iħobb jintervieni fil-ġlieda biex tkun prolungata, donnu jieħu pjaċir bit-tilwim. Din ir-razza ta’ nies jeħtieġ ngħassu kontriha. Ġlieda jikluha. Kulfejn jarawha, flok iberduha, isaħħnuha. Jista’ jkollok il-ġamar mingħajr faħam, jew in-nar tal-ħatab mingħajr kebs? Daqshekk ieħor hu neċessarju l-bniedem ġelliedi għall-ġlied. Biex tagħmel barbikju, għalxejn tieħu l-grill, is-sulfarini, il-laħam u l-ħwawar, għax jekk m’għandikx ċarkowl kollox se jibqa’ nej. Hekk ukoll, il-ġlied jinqala’ minħabba l-ispirtu bellikuż tal-partijiet involuti, u mhux minħabba ċ-ċirkostanzi u l-kwistjonijiet eżistenti.
Meta kont l-aħħar involut fi ġlieda, f’argumenti sħan, għajjat u kliem iebes? Kif inqalgħet il-ġlieda? Jekk taħseb li tista’ twaħħal f’martek, stenna ftit. Tista’ tistqarr quddiem Alla li int perfett? Ladarba tammetti n-nuqqasijiet tiegħek, għax ma tammettix ukoll li fik għad hemm dak l-ispirtu ġelliedi, il-kawża ta’ ħafna nkwiet? Taħsibx li b’hekk qed inġiegħlek tiskuża l-ħtija tal-persuna l-oħra; kull wieħed minna hu responsabbli quddiem Alla għal kif jirreaġixxi. Iżda int, ibda biex teżamina lilek innifsek, għax tiegħek innifsek trid tagħti kont quddiem Alla.
Minn fejn jisponta l-inkwiet u l-battibekki fil-familja? Minħabba t-tfal, il-ġirien, il-flus jew s-sħana? Le. Il-ġlied ġej minnek li int involut fih. Filwaqt li t-tfal u l-ġirien jistgħu jservu ta’ kenur għall-ġlied, il-kebs hu int! In-nar jaqbad, jaħraq u jeqred kull feliċità, u jibqa’ biss l-irmied ta’ relazzjoni moribonda, jekk mhux mejta. Jalla l-Mulej illum jikkonvinċik mill-ħtija tiegħek, u tagħmel l-ewwel pass konkret biex tasal għal soluzzjoni biblika tal-ġlied li s’issa kont involut fih.
Talba: “Agħmilni, Sid, strument tas-sliem! Kull fejn nara l-mibegħda agħtini l-privileġġ nintroduċi l-imħabba. Fejn jiżgħed id-dissens, użani biex nippromwovi l-unità. Fejn il-ġlied u t-tilwim jiddomina, ħallini ninnewtralizzahom bi spirtu ġwejjed u umli. Żommni mwaħħad miegħek biex inservi ta’ melħ u dawl għan-nies li jafuni.”
Comments