Minnu, Bih u Għalih

“O, il-fond tal-għana kemm tal-għerf kif ukoll tat-tagħrif t’Alla! Kemm huma inskrutabbli l-ġudizzji tiegħu u intraċċabbli triqatu! Għax ‘Min kien jaf moħħ is-Sid? Jew min sar kunsulier tiegħu?’ Jew ‘Min qatt tah minn qabel biex ikun irrikompensat lilu?’ Għax minnu u permezz tiegħu u għalih huma l-ħwejjeġ kollha. Lilu l-glorja għal dejjem! Ammen” (Rumani 11:33-36).

Is-sentenza l-aktar profonda li nsib fl-Iskrittura kollha indubjament hi din: “Minnu, bih u għalih, huma l-ħwejjeġ kollha. Lilu tingħata glorja għal dejjem.” F’nifs wieħed għandek il-medda infinita tal-għan divin.

Jekk neħduha kontra dir-rieda, li infallibbilment isseħħ, inġibu diżastru fuqna nfusna. Kemm jaqblilna tabilħaqq ikunu sottomessi għall-volontà tiegħu, dipendenti fuq is-Sultan, misjuba miexja fil-mogħdija mfassla għalina, mimlija bl-Ispirtu li jgħajjex u jippriżerva, sensibbli dejjem għan-namur ta’ mħabbtu.

Kemm messna nkunu mbellha bid-differenza bejn x’nirċievu u x’ħaqqna, bejn l-istat li fih ninsab preżentement u l-qagħda li fiha kont bla Kristu u allura bla tama, frustier għall-patt u nieqes miċ-ċittadinanza smewwitija. X’differenza radikali! Meta ħaqqni l-Infern, ingħatajt il-Ġenna b’xejn. Meta kont mejjet, ingħatajt il-ħajja.

Min ikkawża li nkun differenti, jekk mhux Alla li jrieġi kollox u jaħkem fuq kulħadd, li jniżżel lis-setgħanin mit-tron tagħhom u jgħolli minflokhom lil dawk stmati bħala xejn? Ma stajtx inħobbu jekk ma tefagħnix hu stess fl-għargħar ta’ mħabbtu. Dik l-imħabba tkompli tressaqni lejh, tqarribni, toftomni mid-dnub, timmortifika fija x-xehwiet u l-leblibiet mondani. Tagħmilni lest għall-partenza tiegħi biex niltaqa’ ma’ Sidi wiċċ imb wiċċ.

Talba: “Inroddlok ħajr b’qalbi kollha; nagħti qima quddiemek. Infaħħar ismek għat-tjieba u l-fedeltà tiegħek, għax int kabbart ismek u kelmtek fuq kollox. Fil-jum li sejjaħtlek weġibtni; kattarli l-qawwa f’ruħi. Hekk nibqa’ ngħanni dwarek u dwar ħidmietek favur tiegħi, għax kbira hi l-glorja tiegħek. Għalkemm tgħammar fil-għoli, tħares lejn min hu umli. Ħa nkun umli quddiemek, Sid sovran; twarrabnix mill-preżenza tiegħek. Ilqagħna f’isem Kristu Ibnek!”

Comments

Qawwija fid-Dgħufija

“U mqar jekk l-evanġelju tagħna hu mgħotti, hu mgħotti biss għal dawk li qed jintilfu. Fil-każ tagħhom l-alla ta’ daż-żmien għema mħuħ il-miskredenti, sabiex ma jiddix fuqhom it-tidwil tal-evanġelju tal-glorja ta’ Kristu, li hu l-immaġni t’Alla. Għax mhux lilna nfusna nippritkaw, iżda ’l Kristu Ġesù bħala s-Sid, u aħna nfusna l-qaddejja tagħkom minħabba Ġesù. Għax Alla, li qal, ‘Ħa jiddi d-dawl mid-dlam,’ huwa dak li idda fi qlubna għat-tidwil tat-tagħrif tal-glorja t’Alla f’wiċċ Kristu. Imma għandna dat-teżor f’reċipjenti xaqqufin sabiex jintwera li din l-eċċessività tas-setgħa tappartieni għal Alla u mhijiex minna nfusna” (2 Korintin 4:3-7). Hemm kontinwità fil-fidi: ninsabu f’suċċessjoni ta’ demm martri. Ħa ngħaddu t-torċa minn id għall-oħra, minn ġenerazzjoni għall-oħra. Apparti l-fidili fil-knisja stabbilita, insibu n-Novatjani, id-Donatisti, il-Valdiżi (seklu 12), l-Albiġiżi (seklu 13), il-Lollardi (wara Wiklef fis-seklu erbatax), l-Aħwa Boħemjani (seklu 15), u l-Anabattis...

Il-Mogħdrija

“Imma issa intom imisskom tneħħu dawn il-ħwejjeġ kollha: ir-rabja, l-għadab, il-malizzja, l-ikkalunnjar u diskors oxxen minn ħalqkom. Tigdbux lil xulxin, ladarba nżajtu l-bniedem il-qadim bil-prattiċi ħżiena tiegħu, u lbistu l-ġdid, li qed jiġġedded fit-tagħrif veru skont l-immaġni ta’ min ħalqu - tiġdid fejn m’hemmx distinzjoni bejn Grieg u Lhudi, ċirkonċiżjoni u inċirkonċiżjoni, barbaru, Skita, ilsir jew liberu, iżda Kristu hu kollox u f’kulħadd. Mela, bħala l-magħżulin t’Alla, qaddisin u maħbubin, ilbsu sentimenti ta’ mogħdrija, benevolenza, umiltà, manswetudini u paċenzja” (Kolossin 3:8-12). Il-beninnità hi l-ispirtu ta’ trattament favorevoli, jew il-prattika kostanti u abitwali ta’ azzjonijiet amikevoli u benevolenti. Hemm żewġ prinċipji ewlenin fil-kostituzzjoni umana, li jwettqu serriegħa bla waqfien għall-predominanza: l-egoiżmu u l-benevolenza, jew il-beninnità. L-egoiżmu jikkonċentra s-sentimenti, ix-xewqat u l-azzjonijiet kollha fuq il-promozzjoni tal-benesseri i...

Diskors Bid-Dehen

“La taħsibx kif tagħmel il-ħsara lil għajrek huwa u qiegħed jgħammar bla biża’ miegħek. La tiġġieled ma’ ħadd għalxejn, jekk ma għamillek l-ebda deni. Ħu offiż hu aktar iebes biex jintrebaħ minn belt qawwija, u l-ġlied bejn l-aħwa qisu staneg ta’ kastell. Aħjar tgħammar f’rokna ta’ setaħ milli ma’ mara ġellieda f’dar kbira.” (Proverbji 3:29-30; 18:19; 25:24). Matul l-Assedju l-Kbir fl-1565, il-qawwiet Ottomani tħabtu u ssieltu biex jirbħu lil pajjiżna taħt idejhom. Għalkemm kienu ferm aktar numerużi minna, it-Torok iġġieldu għalxejn għal erba’ xhur sħaħ. Il-bliet Maltin, fortifikati bis-swar u balwardi godlija, kienu virtwalment inespjunabbli. Hekk ukoll hu diffiċli tirbaħ lura l-ħbiberija ta’ ħu offiż. Anzi, dal-proverbju jwissina li hu aktar diffiċli tirbaħ lura lil ħuk milli tegħleb belt qawwija. Ma naħsibx li dan inkiteb biex naqtgħu qalbna milli nfittxu rikonċiljazzjoni f’waqtha. Jekk wieħed jistaqsi, x’inhi r-rikonċiljazzjoni? Hi t-tieni ħbiberija. Dan jibqa’ dmir...

PAUL MIZZI

Search This Blog