“Għalhekk ħalli ebda wieħed ma jiftaħar bil-bnedmin! Għax kollox hu tagħkom, sew jekk Pawlu jew Apollo jew Kefa jew id-dinja jew il-ħajja jew il-mewt jew il-ħwejjeġ preżenti jew il-ħwejjeġ li ġejjin – kollox tagħkom, u intom ta’ Kristu, u Kristu t’Alla. Hekk mela l-bnedmin imisshom jikkonsidrawna, bħala servi ta’ Kristu u amministraturi tal-misterji t’Alla. F’dar-rigward hu rikjest mill-amministraturi li wieħed jinstab fidil” (1 Korintin 3:21-4:2).
Tħallix lit-tentatur jipperswadik biex tilqa’ biċ-ċiera l-Kelma tal-ħajja minħabba l-element ta’ korruzzjoni li xi ftit jew wisq jirkaċċa fil-predikatur. Jekk twarrab il-Kelma minħabba d-debolizza tal-kelliem tkun qisek qed tirrifjuta ambaxxatur mibgħut mingħand sultan grazzjuż, kollu aħbarijiet sbieħ, sempliċement għax il-persuna u l-kwalitajiet tal-ambaxxatur ma jinżlulikx.
Apparti minn hekk, tkun qed tikkontradixxi l-amar espliċitu tas-Salvatur tagħna, illi b’awtorità divina tiegħu eżortana biex nisimgħu mqar l-iskribi u l-Fariżej li jpoġġu fuq is-siġġu ta’ Mosè. Qalilna biex nagħmlu skont id-dottrina mgħallma minnhom (ovvjament sakemm din taqbel mal-Iskrittura), iżda ma nikkopjawx għemilhom. Aġir dat-tip jista’ jkun sfidanti, u jiddomanda livell ta’ maturità min-naħa tagħna, iżda hekk irid l-Imgħallem tagħna. Jekk niddistingwu bejn il-baxxar u l-bxara, bejn id-duttur u d-dottrina, niffaċilitaw passina.
Int u tisma’ bierek ’l Alla meta l-omelija jew il-katekeżi jolqtuk fil-laħam il-ħaj. Student fidil fl-iskola tan-Nazzarenu ma jixlix lill-għalliem tiegħu talli ppartikolarizzah. Jekk il-vleġġa laqtitek fil-kuxjenza, ma jfissirx bilfors li mmira lejk. Aktarx, jekk id-dnub tiegħek huwa tant notorju u ħafna nies jinsabu misrumin fih, kif jista’ jimmissja? Jekk hu dnub sigriet, li dwaru ħadd m’għandu ħjiel, jekk il-predikatur ġabek wiċċ imb wiċċ miegħu, bilfors li Alla dderiġieh.
Ħu kemm tista’, aħżen fil-memorja tiegħek, ħalli l-kuxjenza tkun imqanqla, u tippermettix il-Kelma tiżloq ’l hemm bla ma tħalli impatt f’ruħek. Imma jekk minħabba nuqqas ta’ memorja retentiva ma tkunx tista’ żżomm amment tal-punti kollha, almenu żomm il-qawwa u t-togħma tagħhom fl-ispirtu tiegħek. Iż-żokkor idewbuh fl-inbid: ma tibqax tarah, iżda t-togħma tibqa’ u l-effett jagħmlu. Mela fittex li ttiegħem il-veritajiet sublimi tal-vanġelu ħalli l-ispirtu tiegħek jitbaħbaħ fihom. U esibihom fi mġibtek.
Talba: “Nirrealizza, Mulej, illi d-difett sikwit mhuwiex fil-predikatur iżda fija nnifsi. Mhuwiex għaqli għalija nikkritika lix-xandar jew katekist, maħtur minnek stess, meta nista’ faċilment insewwi u nirriforma f’bosta oqsma personali. Agħtini li nisma’ b’dispożizzjoni tajba, bil-fidi u l-manswetudni, sabiex nobdi bi prontizza, għall-glorja tiegħek.”
Comments