“Mara virtuża kuruna għal żewġha, iżda l-mara bla mistħija hi bħal taħsir f’għadmu. Mara tajba min jista’ jsibha? Għax wisq aktar mill-qroll hi tiswa. Qalb żewġha tafda fiha, u l-ebda ġid qatt ma jonqsu. Ġid u mhux deni tagħmillu l-jiem kollha ta’ ħajjitha...Qerq hi l-ħlewwa, u frugħa l-ġmiel, iżda l-mara li tibża’ mill-Mulej hi dik li tkun imfaħħra. Agħtuha mix-xogħol ta’ jdejha, u ħa jfaħħruha fi bwieb il-belt l-għemejjel tagħha stess” (Proverbji 12:4; 31:10-12,30-31).
Hawn ninġiebu wiċċ imb wiċċ maż-żwieġ, istituzzjoni li waqqaf Alla għall-ġid u l-avvanz tal-bniedem. L-iskop oriġinali t’Alla kien li jirregala sieħba lir-raġel biex tkun il-kumpanija sodisfaċenti tiegħu, li f’kull aspett tikkorrispondi għal miegħu, u flimkien ikunu jistgħu jfasslu u jgħixu ħajjithom.
L-isqof Anglikan, Taylor, iddiskorra fuq il-vantaġġi taż-żwieġ. “Jekk int trid il-pjaċir, iżżewweġ; jekk tapprezza s-saħħa robusta, iżżewweġ. Mara twajba hi l-aħħar u l-aħjar għotja tas-sema lill-bniedem. Għalih hi l-anġlu tal-ħniena, il-ministru ta’ grazzji innumerabbli, il-ġemma ta’ bosta virtujiet, il-kaxxetta tal-ġojjelli tiegħu. Leħinha hu l-oħla mużika u tbissimha tagħmillu l-ġurnata tiddi. Il-bews tagħha jservih ta’ gwarniġġjon għall-innoċenza tiegħu; dirgħajha, il-magħlaq għas-sigurtà tiegħu, il-balzmu ta’ saħħtu u l-eliżir ta’ ħajtu. Il-bżulija tagħha hu l-ġid l-aktar stabbli tiegħu; l-ekonomija tagħha, l-amministrattriċi l-aktar għaqlija tiegħu. Xofftejha huma l-kunsillieri l-iżjed fidili tiegħu. Ħobbha hu l-imħadda l-aktar ratba għall-hemm kollu tiegħu. Talbha hu l-avukat l-aktar kompetenti biex jirbaħlu l-barkiet smewwitija fuq rasu.”
Fiż-żwieġ mela, il-mara taffettwa lir-raġel, bi mġibitha u l-atteġġjament tagħha; u r-raġel b’mod simili jħalli l-marka tal-karattru tiegħu fuq martu. Meta l-mara ġġib ruħha bħala mara eċċellenti u mimlija virtù, din tkun tassew għajnuna għar-raġel. Magħha jkun jista’ jafda s-sigrieti ta’ qalbu, jikxef ħsibijietu u l-pjanijiet tiegħu, għax jaf li se tipprova tgħinu, u mhux tirreżistih u tagħmillu l-bsaten fir-roti. It-tali mara tkun tabilħaqq kuruna fuq ras żewġha. Bil-komportament qaddis u sottomess tagħha tkun qed tistmah bħala sultan. Ħa ngħiduha, hekk għandu jkun, għax imbagħad isibha faċli biex jikkonsidraha bħala s-sultana tiegħu.
Kemm qed tieħu ħsieb il-kuruna tiegħek? Qiegħed tillostraha kuljum b’atti ta’ mħabba u mogħdrija? Qiegħed tieħu ħsieb tnaddaf kull djamant u perla fil-kuruna biex jibqgħu jleqqu? Martek hi mogħtija lilek biex tħobbha, u tistmaha bħala t-teżor tiegħek. Jekk m’intix tagħmel dan, oqgħod attent, għax minflok kuruna, tispiċċa biex issibha tifnik u teħodlok saħħtek.
Talba: “O Alla, int waqqaft iż-żwieġ, patt sagru bejn raġel u mara. Grazzi talli tajtni sieħba biex naqsmu ħajjitna flimkien. Billi aħna imperfetti t-tnejn, nitolbok tgħallimna nissaraw u nsolvu kull problema fid-dawl tar-rieda rivelata tiegħek. Qawwina bl-Ispirtu biex nesperjenzaw il-barka tiegħek. F’isem Ibnek nitolbuk. Ammen.”
Comments