“Għax nafu illi jekk it-tinda terrena, li hi darna, hi żarmata, għandna bini mingħand Alla, dar mhix magħmula bl-idejn, eterna fis-smewwiet. Sadattant f’dit-tinda nokorbu, imxennqin biex nitlibbsu bl-abitazzjoni tagħna mis-sema, billi, meta nitlibbsu, ma nkunux misjubin għarwenin. Għax waqt li qegħdin f’dit-tinda, nokorbu għax aħna mtaqqlin, peress li ma nixtiqux ninżgħu iżda nitlibbsu bl-għamara smewwitija, sabiex il-mortali jinbela’ mill-ħajja. Issa dak li ħejjiena għal dan l-istess għan hu Alla, u tana l-Ispirtu bħala kapparra. (2 Korintin 5:1-5).
X’jissapportja lill-fidil waqt it-tbatija u l-prova? Il-fatt li bil-fidi jara ’l Alla inviżibbli u jara l-glorja li għad tiġi wara dan l-għomor qasir fuq l-art. It-tama konfidenti ta’ ħajja eterna u mbierka ma’ Kristu tagħtina l-fibra u l-grinta meħtieġa biex nissaportu u saħansitra nifirħu fil-gwaj t’issa, u tinkuraġġina nfittxu biss l-approvazzjoni tal-Mulej.
X’inhi l-esperjenza normali tagħna f’daż-żmien preżenti? Għalkemm ulied Alla għadhom jgħixu f’did-dinja, ma jifformawx parti integrali minnha; huma meħlusin minnha. Jingħarfu bħala pellegrini, qed jivvjaġġaw lejn Sijon hemm fuq, lejn Ġerusalemm smewwitija. Bħalissa ngħammru f’dar terrestri, tinda, ġisem fiżiku li qed imajna u għad jinqered. Għalkemm ingawdu ħafna barkiet, anke materjali, xorta waħda jibqa’ l-fatt li għaddejjin minn wied ta’ dmugħ, minħabba l-effett tad-dnub fuq univers misħut minħabba fina.
Ma jistax jonqos, mela, li nitniegħdu u nokorbu. M’aħniex dak li suppost aħna, u nixxenqu għal xi ħaġa aħjar. Sakemm nibqgħu f’din l-eżistenza preżenti, inħossuna mtaqqla. Hija ħajja mortali: f’demmna u f’nifisna hemm il-mewt. Is-sospiri tagħna jindikaw il-frustrazzjoni minħabba l-limitazzjonijiet ta’ dil-ħajja preżenti, bid-dnub, bid-dgħufija u l-korruzzjoni tagħha.
Il-Kristjan hu mdejjaq u mikdud l-aktar bid-dnub personali. Fuq kollox, nafu li aħna assenti mill-preżenza immedjata tal-Mulej. Ix-xewqa ultima tiegħu hi li jkun ma’ Sidu. Jaħasra dawk li jimmiraw biss għal dil-ħajja! It-tamiet tagħhom jispiċċaw mal-qabar!
Talba: “Għoġbok, o Missier, illi tagħtina vista biex biha naraw saltnatek. Bl-istess inizjattiva tiegħek daħħaltna fiha biex inkunu sudditi tiegħek, bħala nies ġustifikati. Inroddulek ħajr talli kapaċi żżommna fil-ħarsien tiegħek, biex hekk ħadd min uliedek ma jintilef iżda lkoll naslu biex naraw il-glorja tiegħek, skont it-talba speċifika ta’ Ibnek Ġesù.”
Comments