“Għax ir-rabja t’Alla qed tkun irrivelata mis-sema kontra kull empjetà u inġustizzja tal-bnedmin li jissopprimu l-verità fl-inġustizzja, għaliex dak li jista’ jkun magħruf dwar Alla hu evidenti għalihom, għax Alla lilhom immanifestah. Għax l-attributi inviżibbli tiegħu - kemm is-setgħa dejjiema kif ukoll in-natura divina tiegħu - jidhru distintivament mill-ħolqien tad-dinja, mifhuma mill-ħwejjeġ magħmula, tant li huma bla skuża. Għaliex avolja kienu jafu ’l Alla, la gglorifikawh bħala Alla u lanqas irringrazzjawh, iżda friegħu fi ħsibijiethom, u qalbhom bla sens iddalmet” (Rumani 1:18-21).
Jekk ma nassumux l-enti t’Alla, ebda rendikont tollerabbli ma jista’ jingħata għal kwalunkwe ħaġa oħra. L-istess smewwiet u kulma fihom jixhdu l-glorja tas-Suprem; bla ma jitkellmu x-xemx, il-qamar u l-kwiekeb huma elokwenti fit-testimonjanza armonjuża tagħhom. Apparti minn hekk, għandna wkoll testimonjanza permanenti fina; għax jekk fil-bniedem hemm kuxjenza, kollox jindika illi hemm Alla fis-sema.
L-atej jistgħu jinnegaw kemm iridu, imma xi darba jew oħra jinqabdu fl-inkonsistenzi tagħhom. Jekk, skont huma, m’hemmx Alla, għala ġie li jinvokawh jew anke jikkritikawh fl-avversitajiet tagħhom? Imma jekk hemm, il-għala jiċħduh fil-prosperità tagħhom?
L-irreliġjużi u l-irriverenti sikwit tiġihom tajba f’did-dinja, mentri d-devoti huma misħuqa u kkalpestati huma u miexja fil-mogħdija tal-ġustizzja u l-integrità. B’dax-xenarju quddiemna, nistgħu nkunu mġarrba u niddubitaw x’vantaġġ hemm fil-fidi tagħna fi Kristu. Nistgħu naħsbu illi ċ-ċaħda tagħna nfusna u s-separazzjoni tagħna għal Alla huma ftit aħjar minn taħbit fieragħ.
Imqar fl-antik, nies twajba waqgħu fin-nasba. Asaf, wieħed minnhom, jilmenta, “Tassew, jien saffejt qalbi għalxejn, u ħsilt idejja fl-innoċenza! Kuljum kont imsawwat, u mċanfar kull filgħodu” (Salmi 73:13-14). Aktar u aktar jinkedd meta jara l-kburin, kif jimxu ’l quddiem, u “għajnejhom ’il barra bis-simna; għandhom aktar milli l-qalb tixtieq” (Salmi 73:7). Allura x’differenza hemm bejn dawk li jaqdu ’l Alla u dawk li jaħarbuh?
Ir-raġuni karnali kapaċi tasal biex tagħmel inferenza irreliġjuża bħal din. Tassessja l-prosperità esterna – is-saħħa, ir-rikkezzi, u l-bqija – u tikkonkludi li dawn huma prova konkreta tal-favur t’Alla lejn il-bniedem. Noqogħdu attenti: imqar minn hawn isfel, bosta ħżiena xorta waħda jirċievu retribuzzjoni għall-arroganza tagħhom.
Finalment, il-ħżiena kollha għad ikunu mħallsa skont għemilhom fid-dinja li ġejja. Alla ċertament “irodd lil kull bniedem skont għemilu: lil dawk li bis-sabar ikomplu fl-għemil it-tajjeb ifittxu glorja, u ġieħ, u immortalità, il-ħajja eterna; iżda lil dawk li jmieru, u ma jobdux il-verità, iżda jobdu l-ħażen, qilla, u għadab. Niket u dwejjaq fuq kull ruħ ta’ bniedem li jagħmel il-ħażen…iżda glorja, unur, u sliem lil kull bniedem li jaħdem it-tajjeb, għax Alla ma jurix favoritiżmu” (Rumani 2:6-11).
Xi ftit jew wisq, vag jew fiċ-ċar, kull bniedem jaf fl-intern ta’ qalbu li hekk hu. B’fommu jista’ jinnega; fil-kuxjenza tiegħu jaf li l-istorja hi xort’ oħra. Imqar il-ħżiena u l-irreliġjużi “jafu l-ġudizzju t’Alla, li dawk li jagħmlu dawn il-ħwejjeġ” – dnewwa, rgħiba, malizzja, għira, qtil, tgħajjir, ma jaħfrux, ma jurux ħniena, u t-tali ħwejjeġ – “mhux biss jagħmlu, iżda jieħdu pjaċir b’dawk li jagħmluhom” (Rumani 1:32). L-imġiba tagħhom kontradittorja għat-tagħrif tagħhom.
Hekk jiġri li min ma jemminx illi hemm Alla hu aktar vili mid-demonji. Meta tiċħad li hemm Alla tkun waqajt f’tip ta’ ateiżmu li lanqas biss jinstab fl-Infern.
Talba: “Fil-bidu, o Alla, ħlaqt il-kosmos. Għamilt l-ispazju, mela int apparti mill-ispazju. Għamilt kull materja, allura int ogħla minnha. Għamilt iż-żmien, u allura int etern. Lilek naduraw u nqimu bħala l-oriġinatur ta’ kollox, li tajt bidu għall-univers, int li m’għandikx bidu. Aħna nistqarruk bil-ferħ, għax għemilek hu mifrux madwarna, fuqna u taħtna, quddiemna u warajna.”
Comments