“Fi triq is-sewwa hemm il-ħajja, u fil-mogħdija tagħha m’hemmx il-mewt. F’dar il-ġust hemm ġid kbir, iżda fil-qliegħ tal-ħażin hemm it-taħbit. Xofftejn l-għorrief ixerrdu l-għerf, iżda qalb il-boloh ma tagħmilx hekk. Il-Mulej jistkerrah is-sagrifiċċju tal-ħżiena, iżda t-talb tan-nies retti hu l-għaxqa tiegħu. L-imġiba tal-ħażin jistkerrahha l-Mulej, iżda jħobb lil min jimxi wara s-sewwa. Triq l-għażżien qisha ħajt tax-xewk, iżda l-mogħdija tan-nies retti watja” (Proverbji 12:28; 15:6-9,19).
Din il-verità Alla għarrafielna kemm fil-kuxjenza kif ukoll fl-Iskrittura. Meta wieħed jgħix sewwa, tajjeb u ġust, ikollu l-ħajja ġenwina u l-barka t’Alla. Mhux dak li kultant jagħmel xi opra ta’ karità, imma dak li kuljum ifittex jagħmel ix-xieraq u n-nobbli quddiem il-Mulej. It-tali bniedem iduq il-Ġenna fuq din l-art.
Madankollu, il-bniedem jibqa’ ma jemminx li “fi triq is-sewwa hemm il-ħajja.” Qalbu tassew żonqrija – igiddeb lil Alla, iwarrab il-verità u jfittex il-ħajja f’lok ieħor. Ma jintebaħx li fi tmiem frugħatu jsib il-mewt – id-dalma dejjiema ta’ ruħ iddisprata u mwarrba minn Alla.
Agħżel int: il-ħajja jew il-mewt, il-barka jew is-saħta, is-sewwa jew id-dnub. Imma forsi tgħidli, “Kif nagħżilha triq is-sewwa?”
Darba kien hemm sultan. Qal lill-ministru favorit tiegħu, “Itlobli kulma trid, u żgur nagħtihulek!”
Il-ministru ħaseb, “Jekk ngħidlu jlaħħaqni ġeneral tal-armata, jagħtini l-promozzjoni bla xkiel ta’ xejn. Jekk nirrikjesta nofs is-saltna, ma joqgħodx lura milli jaqtagħli xewqti. Irrid nitolbu ħaġa li magħha jżidli dan kollu.”
Għalhekk preżenta ruħu quddiem ir-re u qallu, “Maestà, jekk għandek pjaċir, agħtini lil bintek bħala marti.”
Ma ħariġx diżappuntat. Hekk sar il-werriet tal-għana u l-unuri kollha tas-saltna. Bl-istess mod, meta nagħżlu lil Kristu Ġesù bħala Sidna, insiru fl-istess ħin werrieta tal-glorja u tas-saltna t’Alla l-Missier. U minn issa jibda jdewwaqna l-glorja smewwitija billi jħarriġna nimxu fil-mogħdija ġusta u qaddisa tiegħu.
Talba: “Is-sewwa jogħġbok, Mulej, għax int innifsek rett u sewwa. Nitolbuk biex il-mexxejja politiċi jamministraw pajjiżna skont il-liġi tiegħek; ninterċiedu wkoll għar-rgħajja fil-knejjes tiegħek, għall-missirijiet fil-familji, kif ukoll għalliema fl-iskejjel, biex ikunu dejjem eżempju tajjeb għall-persuni taħthom. Ħarreġ lili wkoll, Mulej, biex nimxi skont il-prinċipji evanġeliċi li jonorawk u jagħtuk ġieh. Ammen.”
Comments