“Issa l-fidi hi l-assigurazzjoni tal-ħwejjeġ ittamati, iċ-ċertezza t’affarijiet li ma narawx. B’dil-fidi kienu rrikmandati n-nies fl-antik. Bil-fidi nifhmu li l-univers kien ifformat bil-kelma t’Alla, tant li l-ħaġa li naraw ma saritx minn ħwejjeġ viżibbli. Bil-fidi Abel offra ’l Alla sagrifiċċju aħjar minn Kajjin. Permezz tagħha kien mixhud li hu ġust, billi Alla xehed dwar l-għotjiet tiegħu. U permezz tal-fidi għadu jitkellem, avolja miet” (Ebrej 11:1-4).
Ultimament il-fidi hi l-uniku muftieħ li bih jiftiehem l-univers. L-intellett, il-fehma, il-loġika u r-raġuni għandhom posthom, naturalment, għax huma elementi preparatorji, imma bil-fidi nikkomprendu li d-dinjiet saru bil-Kelma t’Alla, u għalhekk il-viżibbli ma sarx minn ħwejjeġ viżibbli. Bix-xhieda inkonfutabbli tal-Kelma li ħarġet minn fomm Alla diġà għandna kors tajjeb fil-kosmoloġija u l-kosmogonija: Alla waħdu kien preżenti meta ngħata bidu għall-ħolqien. Allura hu waħdu xhud kompetenti biex jgħidilna l-kif u x’fatta dwaru.
Time Magazine jgħid hekk dwar it-taqliba kurrenti fl-astrofiżika: “L-esperti ma jafux fiċ-ċert x’inhi l-età tal-univers jew kemm hu kbir. Ma jafux il-parti l-kbira minnu minn xiex hu magħmul. Ma jafu f’ebda dettall kif beda jew kif għad jintemm.”
Ma nkunux preposteri jekk ngħidu li s-sinfikat finali tal-eżistenza umana, u t-tweġibiet għad-domandi li fuqhom il-feliċità tagħna tiddependi ma nistgħux niksbuhom ħlief bil-fidi. L-intellett, ix-xjenza, l-abbiltà purament umana mhijiex wiesa’ biżżejjed biex tabbraċċja tweġibiet bħal dawn.
Ħafna tagħrif dwar ħwejjeġ divini kif ukoll umani jeludina minħabba nuqqas ta’ fidi. Voltaire hu rrapportat li qal, “Jekk jiġri miraklu fis-suq ta’ Pariġi fil-preżenza ta’ elfejn ruħ, nippreferi ma nemminx lil għajnejja stess milli lill-elfejn ruħ.” Il-fatti waħidhom, irrispettiv ta’ kemm huma preżentati tajjeb, qatt ma jressqu bniedem lejn Kristu.
Talba: “Iftaħli għajnejja, Mulej omnipotenti, biex kuljum nara l-għeġubijiet u l-meravilji ta’ ħidmet idejk, mifruxa quddiemi kull fejn nixħet ħarsti. Iftaħli widnejja biex nisma’ l-Kelma li ħarġet minn fommok, biex biha ngħix u ninterpreta sewwa r-realtà madwari. F’ġieħ Ibnek nitolbok dan.”
Comments