“Intom li tibżgħu mill-Mulej, ittamaw fil-Mulej; hu l-għajnuna tagħhom u t-tarka tagħhom. Il-Mulej ħa ħsiebna: iberikna. Ibierek dar Iżrael u jbierek dar Arun. Hu jbierek lil dawk li jibżgħu mill-Mulej, sew żgħar u sew kbar. Il-Mulej ikattarkom iżjed u iżjed, lilkom u lil uliedkom. Kunu mberkin mill-Mulej, li għamel is-sema u l-art” (Salmi 115:11-15).
Min-naħa tiegħi, kapaċi ngħid, “Din hi kelma vera.” Xi tgħid int? Iva, Jaħwe ħaseb għalina; provdielna, farraġna, ħelisna u gwidana. Fil-movimenti kollha tal-providenza tiegħu indokrana u qatt ma nesa l-qagħda baxxa tagħna. Ħsiebu hu mimli bina, kull ħin u kull mument, bla ebda interruzzjoni. Fi żminijet speċjali, ġie li rajna l-interess t’Alla fina b’mod iżjed distint, u kull meta niftakru f’dawk l-avvenimenti, qalbna tfur b’radd il-ħajr. Iva, il-Mulej ħa ħsiebna.
Is-salmista kompla jgħid, “Iberikna,” bħallikieku din hi l-konklużjoni loġika ta’ dak li qal qabel. Ladarba Alla hu immutabbli (ma jinbidilx), ikompli jieħu ħsiebna fil-ġejjieni bħalma għasses fuqna fl-imgħoddi. Meta ngħidu “ħa ħsiebna,” kważi kważi rridu ngħidu wkoll, “iberikna.” Iżda hawnhekk għandna mhux biss il-konklużjoni raġunata tiegħu, iżda d-dikjarazzjoni tal-Ispirtu s-Santu li nebbaħ dil-kelma: “iberikna.”
Fiha hemm moħbija ħwejjeġ kbar u bla tarf. Il-wegħda hi wiesa’ u indistinta apposta, biex jindikalna l-medda infinita tagħha. Alla jberikna skont l-attributi divini tiegħu, bil-qisien tiegħu, għal dejjem. Għalhekk, ejjew ngħidu, “Bierek il-Mulej, o ruħ tiegħi! U kulma hu ġo fija jbierek l-isem imqaddes tiegħu’ (Salmi 103:1).
Talba: “Kemm inħobbuk, Ħallieq u Priżervatur tagħna! Is-sema, imqar is-sema tas-smewwiet, huma tiegħek, iżda l-art tajtha lil ulied il-bnedmin. Għaldaqstant aħna nberkuk minn issa u għal dejjem. Mhux lilna, o Mulej, mhux lilna, iżda lil ismek agħti glorja, għal tjubitek u l-fedeltà tiegħek. Għallimna ngħoddu barkietna, biex ruħna titfawwar bit-tifħir, Sultan il-ġnus! Ammen u ammen!”
Comments