“Hieni min ħtijietu maħfura, min dnubu mistur. Hieni l-bniedem li l-Mulej ma jgħoddlu l-ebda ħtija, u li fl-ispirtu tiegħu m’hemm l-ebda qerq. Meta bqajt sieket, għadmi ntemm bil-krib tiegħi l-jum kollu. Għax lejl u nhar idek tqalet fuqi; saħħti nfniet bħal f’nixfa tas-sajf. Stqarrejtlek dnubi, u l-ħażen tiegħi jien ma ħbejtx. Jien għidt: ‘Nistqarr ħtijieti lill-Mulej,’ u int ħfirtli l-ħażen ta’ dnubi” (Salmi 32:1-5).
Jekk nammettu dnubietna, sinċerament, serjament u bl-umiltà, il-Mulej jingassa d-dejn tagħna kontra tiegħu. Homo agnoscit, Deus ignoscit – il-bniedem jistqarr, Alla jaħfer. L-istqarrija tad-dnub trid tkun imġonġija mal-qatla tad-dnub, altrimenti kollox jintilef. Nitilfu lil Alla, nitilfu lis-Salvatur, nitilfu l-Ġenna, nitilfu ruħna stess.
Il-penitent veru kapaċi jgħid, ma’ Vivaldus, “Ma naħbix dnubieti, iżda nurihom; ma niskużahomx, iżda nakkużahom.” Peccata enim non nocent, si non placent – dnubieti ma jagħmlulix ħsara jekk ma jogħġbunix. Il-bidu tas-salvazzjoni tiegħi huwa t-tagħrif tat-trasgressjoni tiegħi.
“Min isalva ħajtu jitlifha” (Mattew 16:25). Hawn għandna wieħed mill-paradossi li jiżvolġu mill-evanġelju. Sakemm nibqa’ awtonomu, bla ma ndur lejn Alla fi ndiema sinċiera, nassumi illi l-karattru pjaċevoli u ċivili tiegħi huwa, fis-sew u bir-raġun, tiegħi, bħallikieku sawwartu jien bl-isforz morali tiegħi. Kemm indum b’dil-mentalità t-tajjeb tiegħi mhuwiex magħdud bħala tiegħi. Attwalment hi l-grazzja komuni li topera fl-umanità kollha illi wasslitni safejn wasalt.
Biss meta nirrealizza li s-simpatija u kwalunkwe ħaġa pożittiva fija mhijiex tiegħi, iżda hi għotja mingħand Alla, sforz il-benevolenza tiegħu lejn ulied il-bnedmin, f’dak l-istadju nkun bdejt biex nieħu l-evanġelju bis-serjetà li jixraqlu. Meta noffri lili nnifsi u bil-fidi nqiegħed lili nnifsi għad-dispożizzjoni ta’ Ġesù s-Sid, f’dak il-waqt it-tjieba tibda ssir tiegħi. L-uniċi affarijiet li nistgħu nżommu huma l-affarijiet li nagħtuhom lil Alla liberament. Kulma nżommu għalina nfusna hu proprjament dak li ċertament għad nitilfu.
“Min jaħbi dnubietu ma jkollux risq, iżda min jistqarrhom u jabbandunahom isib il-ħniena” (Proverbji 28:13).
Talba: “Impossibbli ninħbew wara subgħajna, Mulej! Int tgħarbilna u tagħrafna; taf id-dħul u l-ħruġ tagħna; taf ħsibijietna mill-bogħod. Nitolbuk sabiex inkunu realistiċi quddiemek, bla ma nipprovaw nilagħbuha ta’ xi ħaġa li m’aħniex jew nippożaw għall-approvazzjoni ta’ ħaddieħor. Miegħek għandna x’naqsmu, o Missier. Agħtina s-sensibbiltà biex nikxfu lilna nfusna quddiemek – għax nafu illi int mimli bil-maħfra, minħabba Ibnek, is-Salvatur tagħna. Ammen.”
Comments