“Mela, l-aħwa, ladarba għandna l-kunfidenza biex nidħlu fil-Qaddis tal-Qaddisin bid-demm ta’ Ġesù, bi triq ġdida u ħajja li inawgura għalina mill-purtiera, voldiri laħmu, u ladarba għandna saċerdot kbir fuq id-dar t’Alla, ħa nersqu b’qalb sinċiera bl-assigurazzjoni sħiħa tal-fidi, bi qlubna mraxxin minn kuxjenza ħażina u l-ġisem maħsul b’ilma pur. Ħa nżommu sħiħ l-istqarrija ta’ tamitna bla ma nivvaċillaw, għax fidil hu dak li wiegħed. U ħa nikkonsidraw kif nistimulaw lil xulxin għall-imħabba u l-opri t-tajba,” (Ebrej 10:19-24).
M’hemm ebda perjodu tul ħajtek li fih m’għandikx bżonn lil Ġesù, il-ħobż ħaj li niżel mis-sema biex wieħed jiekol minnu u ma jmutx. L-istess medjatur tiegħek xerred demmu għalik, biex jagħmlek tiegħu. Hu wkoll il-qasssis il-kbir tiegħek li dejjem jinterċiedi għall-benefiċċju tiegħek. Irid illi dak mibdi fik jasal fit-tmiem xieraq tiegħu. Ġesù ottiena għalik dil-ħniena, kiseb għalik grazzja, dispensata mit-tron tal-Missier.
Bħala midneb teħtieġ urġentement u kontinwament il-miżerikordja u l-grazzja. Jekk tixtieq illi tkun sodisfatt, taf għand min għandek tirrikorri. Kwalunkwe ieħor hu impostur u jiddiżappuntak. Stenna mingħand Ġesù provvista għanja; hu l-aġent li bih jaslulek il-barkiet smewwitija. Għax Alla l-Missier hu l-funtana ta’ grazzja u ħniena. Ġesù s-Salvatur tiegħek hu t-teżorier. Fih tgħammar il-milja kollha. L-Ispirtu s-Santu hu d-dispensier tal-grazzja u l-ħniena. M’għandu jkun hemm ebda apatija jew għażż. Il-privileġġ maqlugħ hu immens. L-inkuraġġiment hu qawwi. “Ħa nersqu b’qalb sinċiera bl-assigurazzjoni sħiħa tal-fidi.”
L-istess awtur, aktar kmieni, iħeġġiġna biex nersqu bil-qlubija. Hi kunfidenza mimlija timenza u riverenza lejn Alla infinit. Il-qlubija tal-fidil hi msejsa fuq Ġesù Sidu, minħabba li miet minfloku. Ma neżerċitawx qlubija minħabba xi virtù fina, lanqas minħabba l-qalb ferventi u s-servizz tagħna.
Talba: “Missierna, m’aħniex kuraġġjużi quddiemek għax indimna jew ninsabu mexjin b’mod attiv fil-mogħdija tal-ubbidjenza, u lanqas għax qed inbatu, xi ftit jew wisq, minħabba l-fidi tagħna. Le, bil-fidi nwaħħlu ħarsitna biss fuq Ġesù, il-Maħbub. Bħala kredenti nersqu b’qalb battala u b’idejn vojta, biex jimtlew bl-għotjiet ħielsa tal-grazzja tiegħek. Ammen.”
Comments