“Ħadd ma jkun jista’ jieqaf quddiemek jiem ħajtek kollha. Bħalma jien kont ma’ Mosè, hekk inkun miegħek: la nħallik u lanqas nitilqek. Agħmel il-ħila u la tibżax, għax inti tagħti lil dal-poplu l-art li jien ħlift lil missirijiethom li nagħtihom. Biss agħmel il-ħila u la tibża’ xejn, biex tagħmel skont il-liġi kollha li Mosè, il-qaddej tiegħi, tak; la ddurx minnha lejn il-lemin jew lejn ix-xellug, biex ikollok ir-risq kull fejn tmur. Dal-ktieb tal-liġi ma jitbiegħed qatt minn fommok, iżda aħseb fuqu nhar u lejk, biex tagħmel skont kulma hemm miktub fih; għax imbagħad inti tirnexxi f’kulma tagħmel u jkollok ir-risq. Ma kmandajtikx jien? Agħmel il-ħila u la tibżax! La titrigħedx u la titwerwirx, għax il-Mulej, Alla tiegħek, ikun miegħek kull fejn tmur” (Ġożwè 1:5-9).
Sikwit nikkwotaw minn dis-silta u ninkuraġġixxu rwieħna biha. Nafu illi l-mandat mogħti lil Ġożwè fl-antik jikkorrispondi mal-kummissjoni u l-ordni mogħtijin lilna llum. Inservu lill-istess Alla, il-Feddej li jżur u jiddefendi l-poplu tiegħu. Il-wegħda mgħoddija lill-mexxej ġdid ta’ Iżrael isservi wkoll bħala l-pedament għal kelma oħra fit-Testment il-Ġdid, “Żgurament mhux se nħallik, lanqas qatt mhu se nabbandunak” (Ebrej 13:5).
Għaliex neħtieġu t-tali assigurazzjoni? Għax quddiemna, bla intermissjoni, hemm mifruxa ħajja ta’ taqbid u ssarar mal-forzi tad-dlam. Il-Mulej tal-eżerċti, però, jinsab fuq in-naħa tagħna.
Imsejħin immexxu lil ħaddieħor? Din il-wegħda tiggarantilna l-għerf u l-prudenza kollha li neħtieġu. Irridu nħabbtu wiċċna mal-makakkerija u avversarji qawwija? Hawnhekk għandna saħħa u qlubija, ħila u vittorja. Għandna wirt vast x’nirbħu? B’dan is-sinjal niksbu l-għan tagħna; il-Mulej innifsu hu magħna. Hu inviżibbli, iżda ġieli saħansitra jiffavorina b’għeliem tal-preżenza konfortabbli tiegħu. M’aħniex se nserrħu fuq l-għeliem; jekk jingħatawlna nroddulu ħajr. Jekk iħallina biex bħallikieku nteftfu fid-dlam, ħa nibqgħu żguri illi jiċċirkondana u jħarisna. Hu magħna, avolja l-avversarji għadhom jinbħu u jimminaċċjaw.
Gwaj tassew għalina jekk il-Mulej ifallina. Iżda billi dan qatt ma jista’ jkun, l-irjieħ ta’ taqlib huma mġegħlin ibattu u jorqdu f’għerien ’il bogħod minn xtutna. F’ebda okkażżjoni l-Mulej mhu se jerħi l-ħabel minn idejh. Jiġri x’jiġri, il-Mulej ikun u jibqa’ fl-istess dgħajsa tagħna. Jekk jidhrilna li “raqad” jew “ma jimportahx minna,” inqajmuh u nappellawlu għall-intervent tiegħu. Il-ħbieb iparpru; l-għajnuna tagħhom tkun qisha raxxa xita f’April. Iżda fidil il-Mulej; jibqa’ l-istess għal dejjem. Ladarba tana kelma, ma jerġax jibdielu. Jerġa’, l-Ispirtu s-Santu jibqa’ jgħammar fina, għax bih il-fidili huma ssiġillati sakemm Alla jdaħħalna fil-preżenza immedjata tiegħu fil-Ġenna.
Talba: “Sid setgħani u emien, qalbi tista’ tkun kalma miegħek, taħt id-dell ta’ ġwenħajk. Ħa nitqawwa fl-isperanza llum. Is-sħab jista’ jikkonfoffa kontrija; f’xi ħin jew ieħor, meta jidhirlek l-aħjar, tonfħilhom u ttajjarhom ’l hemm. Ladarba ma tfallinix, il-fidi tiegħi ma tfallix. Billi ma titlaqnix, jien ma nitilqikx. Seddaqni jien u nafda fik. F’isem Kristu. Ammen.”
Comments