“Tissupponi dan, o bniedem – li tiġġudika ’l dawk li jipprattikaw ħwejjeġ bħal dawn, u frattant tagħmilhom int innifsek – illi int se tiskappa l-ġudizzju t’Alla? Jew tiddisprezza l-għana tal-beninnità, it-tolleranza u l-paċenzja tiegħu, bla ma tirrealizza illi l-beninnità t’Alla hi maħsuba biex tmexxik lejn l-indiema? Imma minħabba l-ebusija tiegħek u l-qalb bla ndiema qed taħżen ir-rabja għalik innifsek f’jum ir-rabja meta l-ġudizzju ġust t’Alla jkun rivelat” (Rumani 2:3-5).
Tisma’ min jipprotesta, “Jekk nirrikorri għand Kristu jkolli nċedi l-gost u l-pjaċir, ma nkunx nista’ nagħmel skoss affarijiet...” Veru! Imma għandek stampa mgħawġa ta’ Kristu. Trid iċċedi kollox, u trid tgħodd in-nefqa; imma kemm jaqbillek! Alla jiddomanda biss li titlaq il-ħwejjeġ ta’ ħsara, mhux il-ġid veru. Alla diġà ta l-aħjar u l-aqwa tiegħu – ma’ Ibnu jagħtina b’xejn benefiċċji u għotjiet oħra.
Kulma ċċedi – il-pjaċiri transitorji tad-dnub u kwalunkwe vizzji – mhuma xejn imqabbla mal-kisba infinita: il-maħfra, il-ġustifikazzjoni, il-ħajja eterna. Iċċedi l-landa biex tottieni d-deheb; iċċedi l-ġojjelli tal-pasta biex tfur bir-rubini, perli u djamanti. Titlaq id-dnub qattiel biex tikseb il-ħajja. Kull min prova t-transazzjoni ħareġ sodisfatt għall-aħħar. Din mela skuża banali: kulma ċċedi int mhu xejn għal ħdejn x’kellu jċedi Kristu għall-imsejħin u l-maħbubin tiegħu.
Skuża oħra hi din: “Jien tajjeb! M’inix perfett, imma qatt m’għamilt deni lil ħadd. Ma nobgħodx; aħjar minn ħaddieħor. Naħseb Alla jaċċettani għat-tajjeb li nkun għamilt.” X’assurdità! Jista’ jkun aktar edukat u ċivili u morali minn prostituta jew wieħed li jmexxi d-droga jew ħalliel jew sakranazz, imma meta titkejjel mal-kmandament il-kbir, tinstab nieqes. Żammejtu? Il-ħin kollu? Bla falliment? Sinċerament? Bi skop li jonora ’l Alla?
Hemm min juża kawtiela oħra. “Jien ħażin wisq biex immur għand Kristu! Ma jaċċettanix!” Possibbli? Min huwa int biex tiddeċiedi għal Kristu? Jaqaw provajt tmur għandu u ħriġt diżappuntat?
“Nibża’ li nittrakka f’xi knisja żballjata, f’xi setta!” jgħid l-ieħor. Jeżistu ħafna denominazzjonijiet, veru; m’aħniex nieqsa mill-firdiet u l-konfużjoni. Kif se nagħżel? Alla mhux qed jistiednek taċċetta xi organizzazzjoni, imma lil Ibnu. Ir-Ragħaj it-Tajjeb kapaċi jiggwidak biex tissieħeb mal-merħla tiegħu; u jagħtik il-kapaċità tisma’ leħnu.
Talba: “Għandna ħabta niżvijjaw, Sinjur Alla, u ninsew il-patt tiegħek magħna. Aħfrilna u sejħilna lura fi ħdanek, biex nonorawk u nħossu l-għożża tiegħek. Li nkunu nafuk hu aħjar mill-għana tad-deheb u l-fidda. Kisser kull argument; xejjen l-iskużi tagħna. Kebbsilna qlubna b’imħabbtek, f’ġieħ Ibnek Ġesù.”
Comments