“Il-frott tal-ġust siġra tal-ħajja, u min hu għaref jirbaħ l-erwieħ. Meta l-ġusti għandhom is-setgħa, il-poplu jifraħ, iżda meta jaħkmu l-ħżiena l-poplu jitniegħed. Fit-triq il-ħażina tal-ħażin hemm nassa, iżda l-ġust jgħanni u jifraħ. Il-ġust jagħraf id-drittijiet tal-imsejknin, iżda l-ħażin la jifhimhom u lanqas jikkonoxxihom. Meta joktru l-ħżiena joktor il-ħażen, iżda l-ġusti jarawhom jaqgħu” (Proverbji 11:30; 29:2,6,7,16).
Bħalma siġra tagħmel it-tuffieħ, hekk il-ġust jipproduċi l-frott – ħidmietu, kliemu, talbu, it-tagħlim u l-eżempju li jagħti. Huwa siġra mtaqqla bi frott bnin li jservi ta’ nutriment għal min hu bil-ġuħ: jagħtihom il-ħajja, il-paċi, il-ferħ.
Ġesù wegħidna illi jekk nibqgħu fih, ċoè, jekk nimxu miegħu f’intimità, b’fedeltà kontinwa, hu jibqa’ fina. Hekk nipproduċu ħafna frott, biex bih ikun imsebbaħ il-Missier. Hi ħaġa ta’ niket tinnota illi għadd ta’ nies li jridu jgħaddu lilhom infushom bħala dixxipli ta’ Ġesù huma bħal dik is-siġra taż-żebbuġ fil-Palestina. Jisimha l-oleaster: f’kollox tixbah lis-siġra taż-żebbuġ: fid-dehra, daqs, lewn u kollox. Tidher ġenwina, ħlief għal fattur wieħed. Ma tagħmel ebda frott! Kemm hawn nies bħalha fil-knisja. Meta nara persuna tokkupa spazju kbir fl-ort spiritwali ta’ Kristu, tassorbi t-tira tal-ħamrija u terda’ d-dawl u s-sħana tax-xemx, u frattant ma tipproduċi xejn reali, ngħid f’qalbi, “Ah! X’oleaster sabiħa!”
Ħajr lil Alla, mhux kulħadd oleaster; hawn min għandu passjoni determinata biex ikun għammiel, fertili għall-Imgħallem tiegħu. Dr. Franklin kien wieħed minnhom: iċ-ċurkett tiegħu kellu tinqixa ta’ siġra mgħobbija bil-frott, bil-mottu: “Ikun bħal siġra mħawla ħdejn nixxigħat tal-ilma, li tagħti l-frott fi żmienha” – meħud minn Salmi 1:3. Meta qorob lejn tmiemu, is-suċċessur pastorali tiegħu talbu għal xi kelma ta’ għerf kondensat biex jibqa’ jgħożżha bħala tifkira u niggieża għall-kuxjenza tiegħu. Dr. Franklin pespes f’widintu, “Għammiel!” kif kienet tixhed għalih il-korsa ta’ ħajtu.
Il-ġust hu għaref f’għajnejn Alla għax b’imġibtu jirbaħ l-erwieħ billi jgħinhom fil-bżonnijiet, ifarraġhom fin-niket, iċanfarhom fl-iżball, jgħaddilhom parir tajjeb meta jkunu mħawdin. L-iktar fattur kruċjali, però, ixandar l-evanġelju ta’ Ġesù Kristu lill-erwieħ mitlufa biex jaslu għandu, u jagħrfuh bħala ħajjithom, biex minnu wkoll jieklu, jixorbu u jkunu mxebbgħin.
Talba: “Missierna, bħall-bidwi, ożborna u saqqina biex nagħmlu frott kotran. Nixtiequ nkunu għal bosta nies siġra tal-ħajja. Għallimna napprovaw l-aħjar ħwejjeġ, sabiex inkunu sinċieri u inoffensivi sa jum Kristu, mimlijin bi frott il-ġustizzja li jiġi permezz ta’ Ġesù Kristu – għall-glorja u t-tifħir tiegħek.”
Comments