“Qaltlu: ‘Jien bint Betwel, bin Milka, li wildet lil Naħor.’ U qaltlu wkoll: ‘Għandna sew tiben u sew għalf biżżejjed, u wisa’ fejn tgħaddu l-lejl.’ U r-raġel miel rasu, u qiem lill-Mulej. U qal: ‘Imbierek il-Mulej, Alla ta’ sidi Abraħam, li ma ħalliex nieqes mill-ħniena u s-sewwa tiegħu lil sidi! U lili l-Mulej mexxieni mit-triq lejn dar ħut sidi.’ Imbagħad it-tifla ġriet u qalet lil ta’ dar ommha dawn il-ħwejjeġ” (Ġenesi 24:24-28).
Jaqblilna nkunu midħla dwar il-manjiera kif Alla jiżvela r-rieda tiegħu lil uliedu, għax f’dal-qasam ħafna jiżolqu fin-niexef u jagħmlu trampi u ħmerijiet, u mingħalihom qed iwettqu r-rieda t’Alla għalihom. Sakemm ir-rivelazzjoni divina, miġbura għall-gwida tal-knisja minn ġenerazzjoni għall-oħra fil-qanun tal-Iskrittura Mqaddsa, kienet għadha mhix kompluta, Alla ġie li ggwida lil niesu b’modi speċjali, personali u pekuljari. Samwel, pereżempju, kellu gwida mhux tas-soltu, u biha wasal biex unzjona sultan fuq il-poplu.
Illum il-ġurnata, fil-maturità u s-superjorità tat-Testment il-Ġdid, ma nistgħux nippretendu l-istess, għax Alla fl-Iskrittura sħiħa tana gwida ċerta, pubblika u għad-dispożizzjoni ta’ wliedu kollha. Ir-regola ordinarja hi l-Kelma t’Alla, li torbotna u tobbligana lkoll. Inkun prużuntuż jekk nippretendi li Alla jittratta miegħi b’rivelazzjoni straordinarja meta diġà tani fanal għal riġlejja u dawl għall-mogħdija tiegħi.
Nissuspetta illi dawk il-Kristjani li jiddomandaw gwida speċjali u personalizzata apparti mill-Iskrittura għadhom ma jafux x’teżor illimitabbli ta’ gwida hemm miġbur bejn qoxra u oħra tal-Bibbja! Il-mod kif nistgħu nsiru nafu r-rieda t’Alla rigward deċiżjonijiet u xeltiet li jeħtieġ nagħmlu f’każijiet diffiċli u kruċjali, huwa billi nfittxu b’diliġenza u nistudjaw l-Iskrittura. Fejn ma nsibu ebda regola partikolari biex tiggwidana f’dan jew dak il-każ partikolari, allura mbagħad ikollna napplikaw ir-regoli ġenerali, u nissodisfaw irwieħna bihom.
Mela, f’każijiet dubjużi, jekk tabilħaqq nixtiequ nkunu nafu Alla x’irid minna u liema xeltiet jixtieqna nagħmlu, dawn ir-regoli bibliċi jservuna bħala għajnuna.
1. Ħa jkollna l-biża’ veru t’Alla fi qlubna, u ħa noqogħdu attenti li ma noffenduhx.
2. Studja l-Kelma aktar, u tħallix l-interessi tad-dinja jintervienu fid-deċiżjonijiet tiegħek.
3. Irreduċi kulma taf fil-prattika, u tkun taf x’inhu d-dover tiegħek fil-prattika.
4. Itlob għall-illuminazzjoni u d-direzzjoni li jmissek tieħu.
5. Segwi l-providenza sakemm taqbel mal-Kelma, u mhux iżjed. Dimostrazzjonijiet stupendi tal-providenza m’għandhomx ikunu aċċettati kontra r-regola tal-Iskrittura.
Talba: “Fuqek, u fuqek biss, niddependi jien, ja Sidi. Ħaġa naf: illi m’għandix jedd fuq triqti stess, u lanqas hu fi nnifsi illi mmexxi l-passi tiegħi. Gwidani u widdibni int. Għallimni u urini t-triq li minnha għandi ngħaddi; wissini u żomm għajnejk fuqi, f’ġieħ is-saltna li għaliha sejjaħtli skont ħnientek, bi Kristu Ġesù. Ammen.”
Comments