“Dawwart wiċċi lejn Sidi l-Mulej, biex infittex bit-talb u t-tħannin, bis-sawm, bl-ilbies tax-xkora u bl-irmied. Tlabt lill-Mulej, Alla tiegħi, u stqarrejt u għidt: ‘O Sidi, Alla kbir u tal-biża’, li tħares il-patt u t-tjieba lil dawk li jħobbuk, u lil dawk li jħarsu l-kmandamenti tiegħek: aħna dnibna u mxejna mgħawweġ. Għamilna l-ħażin u ma ridniex nisimgħu, billi twarrabna mill-preċetti tiegħek u mill-ordinanzi tiegħek, u lanqas smajna mill-qaddejja tiegħek, il-profeti, li kellmu f’ismek lis-slaten tagħna, lill-kbarat tagħna, lil missirijietna u lill-poplu kollu tal-pajjiż. O Sidi, lilek il-ħaqq, iżda lilna l-mistħija tal-wiċċ, bħalma hu llum’” (Danjel 9:3-7).
Billi nemmnu, għandna konfidenza qaddisa biex nersqu lejn it-tron t’Alla. Għalina m’għadux tron ta’ ġudizzju, iżda minħabba Kristu hu tron tal-grazzja. Għalhekk ma nsibuhiex bi tqila nammettu dnubietna ma’ Missierna. Meta d-dnub jitniżżel mit-tron tal-qalb, il-ħtijiet l-iżjed sigrieti jmejlu l-qalb b’umiltà quddiem il-Ħaruf. Demmu hu t-tindif tagħna; kuljum nirrikorru għandu għall-purifikazzjoni.
Bħala fidili m’aħniex kapaċi nifhmu l-erruri kollha tagħna. “Min jista’ jagħraf l-għeltijiet tiegħu? Naddafni minn ħtijieti l-moħbija. Ħares il-qaddej tiegħek mid-dnubiet tat-tkabbir; tħallihomx jaħkmuni. Imbagħad inkun bla ħtija, u mnaddaf minn ħtija kbira. Ħalli l-kliem ta’ fommi u l-ħsibijiet ta’ qalbi jkunu milqugħin quddiemek, o Mulej, blata tiegħi u ħellies tiegħi” (Salmi 19:12-14).
Nafu illi anke d-dnubiet li m’aħniex konxji tagħhom jeħtieġ jinħaslu, għax Alla hu omnixjenti u xejn mhu moħbi minnu. Il-fidili jafu wkoll illi d-dnub mhux biss għandu ż-żahar u l-frott, iżda wkoll l-għeruq imqabbad fihom. Mhux biss jagħmlu atti ħżiena, iżda wkoll għandhom natura mniġġsa mnejn jispontaw dawn l-atti.
Apparti li jistqarru, jinviġilaw u joqogħdu attenti. Isejħu lil Alla biex iżommhom b’setgħetu. Ma jimminimizzawx id-dnub u lanqas iċekknu d-deformità odjuża tiegħu. Ma jirreferux għalih b’ismijiet iktar mansi milli jistħoqqlu, għax ikunu awtomatikament qed iraħħsu l-valur infinit tad-demm prezzjuż ta’ Kristu, imxerred biex ipatti għal ħtijiethom.
Lanqas ma jippretenduha li laħqu l-perfezzjoni; l-Ispirtu s-Santu jżommhom mit-tali errur. Jgħallimhom illi bħala midinbin imsejkna, jeħtiġilhom iħarsu kostantement lejn is-Salvatur. Jurihom illi mqar l-ikbar qaddis, stabbilit u msejjes fis-sod, jekk jitħalla għalih waħdu, dikment jaqa’ f’reati mill-agħar u dnubiet prużuntużi. Waħdu mhux kapaċi jduq ir-rebħa.
Importanti għalina neżerċitaw il-fidi kuljum, u kuljum inraħħmu lill-Feddej tagħna biex irebbaħna miegħu. Għax id-dnub ma jiddominax fuqna, għax m’aħniex taħt il-liġi iżda taħt il-grazzja (Rumani 6:14).
Talba: “Alla tagħna, foħrija u ġieħ u ringrazzjament lilek! Għax il-grazzja tiegħek tirrenja għalina u fina. Bħalma wegħidt hekk għamilt: tfajt il-biża’ tiegħek f’qalbna biex ma nitwarrbux minnek. Tajtna l-maħfra u magħha l-ħarsien mid-dnub. Ħalleluja! Ammen.”
Comments