“Pawlu, appostlu ta’ Kristu Ġesù bil-volontà t’Alla, skont il-wegħda tal-ħajja fi Kristu Ġesù, lil Timotju, ibni l-maħbub: il-grazzja, il-ħniena u s-sliem migħand Alla l-Missier u Kristu Ġesù Sidna. Nirringrazzja ’l Alla, li naqdih b’kuxjenza pura bħalma għamlu l-antenati tiegħi, kif niftakar fik kontinwament fil-petizzjonijiet tiegħi lejl u nhar. Jien u niftakar fid-dmugħ tiegħek, nixxennaq biex narak, sabiex nimtela bil-ferħ. Niftakar fil-fidi sinċiera li tinsab fik, li għammret l-ewwel f’nanntek Lojde u f’ommok Ewnike, u ninsab persważ illi issa tgħammar ukoll fik” (2 Timotju 1:1-5).
Għaliex jeħtieġ inkunu sinċieri? Kull grazzja Kristjana (umiltà, ħlewwa, ġenerożità, ferħ) tista’ tkun falsifikata mill-ipokritu, kif nintebħu mis-Salmi: “Xħin qered lil x’uħud minnhom, kienu jfittxuh; u nidmu, u reġgħu fittxew lil Alla. U ftakru li Alla hu l-blata tagħhom, u Alla l-Ogħla l-feddej tagħhom. Madankollu huma kienu jfaħħruh b’fommhom, u gidbulu b’ilsienhom, għax qalbhom ma kinitx sewwa miegħu” (Salmi 78:34-37).
Nistgħu nevanġelizzaw ħafna bħala għata għad-diżubbidjenza tagħna. Insibuha diffiċlu nersqu lejn Alla fit-talb appuntu minħabba l-insinċerità tagħna. Ma nistgħux ingawdu l-preżenza t’Alla fit-talb meta nafu li Alla jaf l-istat ta’ qlubna, u biħsiebna nibqgħu kif aħna! Għalhekk huwa l-bniedem ta’ moħħ seren u sinċier illi kapaċi jirrealizza t-tifsira spiritwali tal-ħajja. Is-sinċerità miegħi nnifsi hi l-kondizzjoni ta’ integrità spiritwali.
Għaliex is-sinċerità hi daqshekk eċċellenti u ta’ min jixtieqha? Is-sinċerità tagħmilna nleqqu. Hi x-xemx għall-virtujiet l-oħra, il-pjaneti li jduru magħha. Biha, il-Kristjan sinċier igawdi sliem profond meta jgħaddi mill-mewt biex jidħol fid-dar eterna. Is-sinċerità tagħmilna nixbhu lil Alla, li l-Iskrittura ssejjaħlu Alla tal-verità. Fidi, imħabba, indiema, ċaħda tagħna nfusna u l-bqija, avolja essenzjali, ma jistgħux jissaħħu mingħajr sinċerità. Tkun qisek qed timmultiplika l-karti tal-flus foloz, flok taħdem biex taqla’ waħda ġenwina.
Pawlu implora ’l Alla ħalli l-aħwa jkunu mżejna bis-sinċerità: “biex tagħżlu dak li hu l-aħjar; biex tkunu sinċieri u bla ħtija sal-jum ta’ Kristu” (Filippin 1:10). Il-vantaġġi tas-sinċerità huma varji. Is-sinċerità tippreparani għall-assigurazzjoni tas-salvazzjoni tiegħi. Tassistini biex nissara kontra d-dnubiet li qed ixebilkuni. “Mulej, salvani mid-dnubiet li jsejħu lilhom infushom venjali.” Is-sinċerità tippreparani l-aħjar għal xirka pjaċevoli m’Alla.
“Il-Mulej, l-ewwel u qabel kollox, irid is-sinċerità fis-servizz tiegħu, sempliċità fil-qalb bla makakkerija jew falsità,” jgħid Kalvinu. U l-istemma tiegħu xi skrizzjoni kellha? “Cor meum tibi offero, Domine, prompte et sincere” ċoè, “Qalbi noffrilek, Mulej, fil-pront u sinċerament.” X’riżoluzzjoni sublimi! Tabilħaqq, kif jgħid Shakespeare, ebda legat mhux daqshekk rikk daqs l-onestà.
Talba: “Alla tas-sewwa, nirrealizza illi kwalunkwe don jisfa bla siwi jekk mhuwiex abbinat mas-sinċerità. Int tikkonsidra biss idejn safja, mhux idejn mimlija, u bniedem onest hu l-opra l-aktar nobbli tiegħek. Sawwar minni t-tali persuna, biex fuq ħajti jkolli t-tbissima paterna tiegħek. Nitolbok għan-nom ta’ Ibnek l-għażiż. Ammen.”
Comments