“Ewwilla ma tifhmux illi kulma jidħol fil-ħalq imur fl-istonku u mbagħad jinxteħet ’il barra fil-latrina? Imma l-ħwejjeġ li jipproċiedu mill-ħalq joħorġu mill-qalb, u dawk iniġġsu l-bniedem. Għax mill-qalb joħorġu l-ħsibijiet ħżiena, l-omiċidji, l-adulterji, il-fornikazzjonijiet, il-ħelliet, it-testimonjanzi foloz u l-kalunnji. Dawn huma l-ħwejjeġ li jniġġsu l-bniedem; imma li tiekol b’idejn mhux maħsulin ma jniġġisx lill-bniedem” (Mattew 15:17-20).
Il-fidi tagħna, kif gwidata mill-Iskritturi, mhi offruta ebda psikoloġija sistematizzata jew xjentifika tal-qalb. Bħala bnedmin m’aħniex ġisem u ruħ, imma entità ħajja ta’ qawwa vitali, organiżmu psikofiżiku. Indubjament, aħna influwenzati esternament – mix-xitan u spirti mniġġsa, jew inkella mill-Ispirtu s-Santu. Fil-psikoloġija moderna l-enfasi tinsab fuq fatturi dinamiċi li joperaw internament, għalkemm interess ġdid huwa evokat minn studji ta’ forzi ambjentali bħala fatturi li jinfluwenzaw il-komportament uman.
F’sens ġenerali, ‘il-qalb’ kif użata fit-Testment il-Qadim tfisser il-parti moħbija jew l-aktar ġewwinija ta’ kwalunkwe ħaġa. Għaldaqstant, naqraw litteralment dwar il-qalb tal-baħar, il-qalb tas-smewwiet u l-qalb tal-arka. Sikwit hi wżata f’sens psikoloġiku, bħala ċ-ċentru jew fokus tal-ħajja personali u interna tal-bniedem. Hi s-sors, jew l-għajn, tal-motivi, il-maqgħad tal-passjonijiet, iċ-ċentru tal-proċessi tal-ħsieb, u l-kwartieri tal-kuxjenza. Hi assoċjata ma’ dawk li llum niddeskrivuhom bħala l-elementi konjittivi, affettivi u volizzjonali tal-ħajja personali.
Il-qalb hi l-maqgħad tas-sapjenza, tal-afdar jew konfidenza, tal-diliġenza, tal-perversità u l-immaġinazzjonijiet ħżiena, tal-leblieba, tas-sottilità, il-fehma, l-ingann, il-bluha, il-qrusa u l-għali, tal-feliċità u l-ferħ, it-tagħrif, il-kburija u l-arroganza, tal-prudenza kif ukoll tal-ġelożija.
Talba: “Sidna Ġesù, int sħaqt fuq l-importanza illi qalbna tkun fi stat tajjeb. Aċċertajtna illi biss is-safja f’qalbhom għad jaraw lill-Missier. Urejtna kif id-dnub hu kommess l-ewwel fil-qalb, imbagħad fl-att. Esiġejt illi l-maħfra tagħna lil xulxin trid tkun mill-qalb, kif ukoll imħabbitna tkun bla wiri ta’ ħaġa b’oħra. Agħmel, o Mulej, illi din kelmtek, miżrugħa fi qlubna, tnibbet hemmhekk biex ukoll tipproduċi frott kotran.”
Comments