“Malli daħlu ġewwa l-qabar, raw ġuvnott bilqiegħda fuq il-lemin, imxedded ċulqana bajda, u kienu allarmati. Imma hu qalilhom, ‘Tallarmawx irwieħkom. Qed tfittxu ’l Ġesù n-Nazzarenu, li kien mislub. Hu rxoxtat! Mhuwiex hawn. Araw, hawn hu l-post fejn qegħduh. Iżda morru, għidu lid-dixxipli tiegħu u ’l Pietru illi sejjer qabilkom fil-Galilija. Hemmhekk se tarawh, proprjament bħalma qalilkom.’ In-nisa ħarġu u ħarbu mill-qabar, għax qabadhom it-tregħid u l-iskantament. Ma qalu xejn lil ħadd, għax beżgħu” (Mark 16:5-8).
Il-fidi tagħna hi msejsa irrevokabbilment u essenzjalment fuq l-għemil mirakoluż t’Alla: il-ħolqien, l-inkarnazzjoni t’Ibnu, l-irxoxt tiegħu mill-qabar li hu l-garanzija tal-irxoxt tagħna fl-aħħar jum. Mingħajr ir-reżurrezzjoni ta’ Kristu l-fidi tagħna hi ċajta goffa, u d-dnub jibqa’ kkakkmat ma’ ruħna. Apparti l-miraklu suprem li seħħ fl-ewwel Għid il-Kbir, Alla fi stadji diversi matul l-istorja tas-salvazzjoni interviena bl-għemil speċjali, sorprendenti u spettakolari tiegħu, biex jawtentika u jikkonferma l-messaġġiera tiegħu (profeti, appostli, u fuq kollox lil Ibnu stess), isaħħaħna fil-fidi, u jurini l-għan tiegħu.
Stephen Charnock imur oltre minn hekk. Jgħid, “Insejħulhom mirakli kulma hu mwettaq barra mill-korsa tan-natura, u kuntrarju għan-nixxiegħa u l-kurrent tagħha. In-nies jimmeraviljaw bil-mirakli għax rari jarawhom jew jisimgħu dwarhom, u jqisuhom bħala avvenimenti rari fid-dinja. Fil-verità, hemm aktar qawwa espressa fl-istazzjon ordinarju u l-mozzjoni ta’ kawżi naturali, milli f’dawk il-ħidmiet straordinarji ta’ setgħa….
“In-nar jiddistruġġi u jikkonsma kontinwament, u b’lupa kbira jibla’ kulma hu offrut quddiemu. Għalija dan hu l-effett ta’ qawwa daqstant potenti bħalma kien il-waqfien tal-aptit tan-nar għal ftit mumenti bħal fil-każ tat-tlett itfal. Jerġa’, it-tkabbir ta’ ftit żerriegħa żgħira mill-ħamrija, b’multiplikazzjoni tal-posterità numeruża tagħhom, hi effett ta’ qawwa daqstant kbira bħat-tmigħ ta’ bosta eluf bi ftit ħobżiet b’awmentazzjoni sigrieta minn id is-Salvatur. Il-kimika li tipproduċi l-għenba delizzjuża minn art niexfa, xita insipida, u dielja morra, hi għelm daqstant ammirabbli ta’ setgħa divina bħal meta l-Feddej tagħna ttrasforma l-ilma f’inbid.”
Għadd ta’ Kristjani moderni jippretendu li l-mirakli jibqgħu jseħħu matul iż-żminijiet, għall-benefiċċju ta’ kull ġenerazzjoni. Evidentement dan mhuwiex fil-pjan t’Alla.
Richard Baxter jargumenta hekk: “Għandna l-użu sħiħ u l-benefiċċju tal-Ispirtu s-Santu li kien mogħti fil-bidu. Dak is-siġill li f’dak iż-żmien ingħata lid-dottrina Kristjana, inkorporata fl-Iskrittura, għadu validu. Meta Kristu ta prova sħiħa lid-dinja dwar ir-realtà tal-medjazzjoni tiegħu, dwar il-karigi u d-dottrina tiegħu, niddomandaw mingħandu illi jkompli l-istess azzjonijiet indefinittivament? Mhuwiex biżżejjed, ewwilla, illi ssiġilla kollox darba? Ikollu jqiegħed siġill ġdid għal kull bniedem li jisħaq għalih f’kull żmien?
“Jekk hu hekk, il-mirakli ma jibqgħux mirakli. Jaqaw sid il-kera huwa kostrett jissiġilla d-dokument tal-kirja tiegħek mill-ġdid sempliċement għax bi traskuraġni tilmenta dwar is-siġill diġà mogħti tiegħu? Allura, jekk Kristu għamel mirakli fost l-eluf, kull bniedem li ma kienx preżenti jista’ jersaq fuqu u jinsisti, ‘Agħmel l-istess mirakli quddiemi wkoll, għax inkella ma nemminx fik.’ Se ġġib ’l Alla f’dil-pożizzjoni, illi bilfors ikollu jagħmel mirakli kostanti f’kull żmien, u quddiem kull persuna, jew inkella ma jkunx emmnut?”
Talba: “Mulej Ġesù, jiena nemmen fik! Nemmen għax ebda bniedem ieħor ma wettaq għemejjel meraviljużi u setgħana bħalma għamilt int, b’xhieda kotrana. Nemmen għax għelibt il-mewt, bħalma bassart, u issa qed tgħammar f’qalbi, renjanti fuq id-dnub u kull forza tad-dlamijiet. Infaħħrek, Ħellies potenti tiegħi. Kompli aħdem fija r-rieda qaddisa tiegħek. Ammen.”
Comments