“Hekk jgħid il-Mulej, ‘Minħabba tliet dnubiet ta’ Gaża, anzi minħabba erbgħa, ma nbiddilx il-kastig tagħha…Minħabba tliet dnubiet ta’ Tir, anzi minħabba erbgħa, ma nraġġax lura l-kastig tagħha…Minħabba tliet dnubiet ta’ Iżrael, anzi minħabba erbgħa, ma nraġġax lura l-kastig tiegħu, għax huma jbiegħu l-ġust għall-flus, u l-fqir għal par sandli, u jirfsu ras l-imsieken fuq it-trab tal-art, u jgħawġu triq il-ġwejdin (Għamos 1:6,9; 2:6-7).
Id-dnub jiddomanda prezz għoli, imqar minn dawk mifdija minnu. Avolja m’għadhomx taħt il-kundanna u s-saħta tiegħu, ulied Alla xorta waħda jbatu l-konsegwenzi skabrużi tiegħu fuq l-art. Sawl, meta kkomprometta ruħu b’Agag, tilef il-kuruna u s-saltna. Sansun, bl-iċċaċċrar tiegħu ma’ Delila, tilef saħħtu, il-vista, il-libertà u ħajtu stess.
Imma x’inhuma dawn id-disfatti għaċ-ċediment tal-qawwa spiritwali, għat-telfa ta’ komunjoni m’Alla, għat-telfa tal-Ispirtu tad-dawl, tal-ħajja, il-libertà u l-glorja? X’inhuma meta mqabbla mat-telfa tal-ferħ inesprimibbli, u l-paċi li tisboq kull dehen?
Intenni, il-mogħdijiet midinba ta’ wlied Alla huma l-kawża ta’ qrusa biżżejjed. Il-Kristjan ma jistax imesmes mad-dnub ħlief b’falliment u defiċit kbir. Jekk Pawlu jippermetti mqar miżura ta’ kburija, Alla jumiljah b’xewka f’ġismu, biex ixxekklu. Jekk xi dixxiplu jiftaħ il-bieb imqar sokkjuż għad-dnub, il-qagħda tiegħu f’daru ssir skonfortabbli, jirżaħ b’għemilu stess. Jekk l-avventurier Kristjan ifettillu jitgħabba b’element ta’ dnub, il-pellegrinaġġ tiegħu jitlef l-għana tas-salmi minn fuq fommu.
Għeli waqa’ fi traskuraġni u indulġenza lejn uliedu, imbagħad l-arka t’Alla nqabdet mill-Filistin, uliedu sfaw maqtula fil-battalja u mart ibnu mietet. Hu nnifsu jispiċċa b’għonqu miksur. Id-dnub ma jnissel xejn ħlief traġedji fost il-mifdija. Billi jgawdu l-maħfra u jinsabu ġustifikati, ma jfissirx li għandhom liċenzja għad-dnub. Id-dnub jibqa’ jisloħ bla ħniena, tirann bla raġuni. David, meta kkawża l-mewt ta’ Urija u raqad ma’ martu, kien imkeċċi mill-palazz, il-konkubini tiegħu sfaw imniġġsa, u ibnu stess maqtul. Kalamitajiet imwiegħra waqgħu fuqu.
Talba: “Bħala nies magħrufin minnek, Missier smewwieti, salvati bil-grazzja tiegħek, għandna raġun nibżgħu. Ħa jkun il-biża’ tiegħek determinattiv f’kull qasam ta’ ħajjitna, minn ġurnata għall-oħra. Int kont u tibqa’ Alla mill-aktar ġust u rett, u hekk insibuk, mhux biss mal-mitlufa iżda magħna wkoll. Ħa jkollok ħniena minna; u tħalliniex nabbużaw minn ħnientek. Għallimna nużaw il-libertà tagħna għall-ubbidjenza tal-liġi tiegħek. F’isem Ibnek Ġesù. Ammen.”
Comments