“Mela, bħala l-magħżulin t’Alla, qaddisin u maħbubin, ilbsu sentimenti ta’ mogħdrija, benevolenza, umiltà, manswetudini u paċenzja. Issaportu ’l xulxin u aħfru ’l xulxin, jekk xi ħadd għandu lment kontra ħaddieħor; bħalma appuntu ħafrilkom is-Sid, hekk ukoll agħmlu intom. U fuq dawn il-virtujiet kollha ilbsu l-imħabba, li hi r-rabta tal-armonija perfetta. Ħa jarbitra s-sliem ta’ Kristu fi qlubkom, li għalih tabilħaqq kontu msejħin f’ġisem wieħed. U kunu grati. Ħa tgħammar ġewwa fikom kelmet Kristu bl-għana, tgħallmu u tammonixxu ’l xulxin b’kull għerf, tkantaw salmi, innijiet u kanzunetti spiritwali, b’rikonoxxenza fi qlubkom ’l Alla. U kull ħaġa kwalunkwe li tagħmlu, sew bil-kelma jew inkella fl-att, agħmlu kollox f’isem is-Sid Ġesù, filwaqt li tirringrazzjaw ’l Alla l-Missier permezz tiegħu. (Kolossin 3:12-17).
Jekk nieqaf u nistaqsi lili nnifsi, “Min jien?” qajla nkun naf xi nwieġeb. Imma sforz ir-rabta tiegħi ma’ Kristu, u sforz l-unjoni mistika li ngawdu miegħu, nista’ niddefinixxi lili nnifsi u lil ħuti b’diversi termini li flimkien jagħtu idea tal-istatus li fih ninsabu promossi.
Fl-Iskrittura l-fidili huma popolarment denominati bħala qaddisin. Jingħad li aħna Kristjani tliet darbiet biss. Oriġinarjament l-isem kien ivvintat bħala laqam, probabbilment f’sens peġġorattiv; kienu l-pagani f’Antjokja li sejħulna hekk l-ewwel darba, u aħna adottajnieh. Bħalma kien hemm il-Caiserianoi, in-nies devoti lejn l-emperatur Ruman, issa tfaċċaw il-Christianoi, is-sudditi leali ta’ Kristu.
Apparti minn hekk, aħna msejħa wkoll tfal t’Alla u wliedu, ulied id-dawl, ulied il-jum, ulied l-ubbidjenza, fidili, ħbieb ta’ Kristu, nagħaġ tal-merħla tiegħu, aħwa fl-istess familja divina, suldati, xhieda, amministraturi, ċittadini smewwitija, dwal fid-dinja, il-maħbubibn, il-maħturin u l-imsejħin t’Alla, l-ambaxxaturi tiegħu, il-ministri, il-qaddejja u d-dixxipli ta’ Ġesù, werrieta t’Alla, werrieta ma’ Kristu, friegħi fid-dielja l-vera, membri fl-istess ġisem mistiku, ġebel ħaj li jifforma t-tempju tal-Ispirtu s-Santu, epistoli ħajjin, segwaċi jew dixxipli ta’ Ġesù, akar minn rebbieħa, vittorjużi, konkwistaturi, u l-bqija.
Dawn kollha fihom tagħbija ta’ sinifikat. Kollha jikkontribwixxu biex jiddefinixxu x’sar realment meta wieħed hu mwieled mill-ġdid.
Allura x’attitudni jmissni nadotta jien u niżvolġi din l-identità? Blaise Pascal jissuġġerixxi: “Agħmel il-ħwejjeġ żgħar bħallikieku kienu kbar, minħabba l-maestà tal-Mulej Ġesù Kristu, li jgħammar fik. Agħmel ħwejjeġ kbar bħallikieku kienu żgħar u ħfief, minħabba l-omnipotenza tiegħu.”
Niftakru li qajla għandna ħjiel x’ħejja l-Missier għal dawk li jħobbuh. Mhux aħjar, allura, inħejju qalbna, u naġġostaw l-azzjonijiet tagħna? Fil-ħdax ta’ Marzu, 1830, tifla ċkejkna Ingliża kien imissha l-lezzjoni mat-tutur tagħha. Dakinhar inzertat lezzjoni li kellha x’taqsam mal-familja rjali. Hi u tistudja ċ-ċart ġenealoġika fil-ktieb, saret konxja ta’ fatt sorprendenti: kien imiss lilha li tiret it-tron! Għall-ewwel bkiet, imbagħad ħarset lejn l-għalliem u qaltlu, “Se nkun brava!” Il-fatt li ċ-ċkejkna Victoria kellha xi darba tkun inkurunata reġina mmotivaha biex tgħix fuq livell ogħla.
Nistgħu naffordjaw inqas minn hekk, jekk is-saltna li se nirtu hi waħda eterna?
Talba: “Skont il-favur tiegħek lejna, Mulej, tajtna status inkredibbilment għoli quddiemek. Minn issa stess tagħrafna bħala maħfura, qaddisin u saħansitra wliedek adottivi, eredi ta’ saltna eterna. Ma’ dil-qagħda nagħrfu wkoll ir-responsabbiltà solenni illi nikkomportaw irwieħna b’mod konformi mal-vokazzjoni tagħna. Tħalliniex nonqsu minn din l-isfida! Ammen.”
Comments