“Huma servi ta’ Kristu? (Nitkellem bħallikieku qed nherwel.) Jien iżjed minnhom: f’taħbitiet iżjed bil-kotra, fi priġuneriji aktar spiss, f’tiswit eċċessiv, u sikwit espost għall-mewt. Ħames darbiet laqqatt mingħand il-Lhud l-erbgħin daqqa neqsin waħda. Tliet darbiet kont imħattar, darba mħaġġar, tliet darbiet innawfragat; għaddejt lejl u jum fl-għammieq. Kont sikwit fuq vjaġġi, f’perikli mix-xmajjar, f’perikli mill-briganti, f’perikli min-nies ta’ ġensi stess, f’perikli mill-Ġentili; f’perikli fil-belt, f’perikli fil-barr, f’perikli fuq il-baħar, u f’perikli minn aħwa foloz. Kont fit-taħbit u fl-istrapazz, sikwit fi ljieli bla rqad; bil-ġuħ u l-għatx, sikwit għaddejt bla ikel; fil-ksieħ u l-għera. Apparti dawn il-ħwejjeġ esterni, hemm kuljum il-pressjoni fuqi, ċoè, l-ansjetà tiegħi għall-knejjes kollha” (2 Korintin 11:23-28).
Il-Kristjan m’aħniex ngħidu li ma jiżbaljax, imma almenu jaf jipparaguna u kapaċi, jekk irid, jaġixxi skont id-dehen mogħti lilu. Il-ħwejjeġ temporali ma jistmahomx bħala l-kargu biex itaqqal il-ġifen tiegħu, iżda aktarx bħala s-saborra, xi ħaġa utli għall-istabbiltà, biex jibqa’ jbaħħar u jfendi. Huwa konvint illi jeħtieġlu juża d-dinja, iżda jgawdi l-Mulej. Allura, imqar meta l-istaġun jiġih skabruż, kapaċi jgħid, “Iż-żmien ħażin, imma Missieri tajjeb.”
Frattant iħaddem il-fidi tiegħu, u jintrabat m’Alla. Għax il-vanġelu ma jsemmix rikkezzi, pjaċiri, intelliġenza intellettwali, saħħa fiżika jew ġmiel. Jekk Alla jagħtina minn dawn, jagħtihomlna skont il-grazzja komuni tiegħu, bħalma jtella’ x-xemx tiegħu fuq il-ġust u l-inġust. Intrabat b’patt ma’ Ibnu, illi kawża tal-mewt u l-irxoxt tiegħu, jifdina u jiġġustifikana, iva jqaddisna wkoll, iżda ma wegħidniex avvanz materjali. Huwa minnu li tul il-Patt il-Qadim dawn il-ħwejjeġ huma menzjonati u sikwit mogħtija, skont il-wegħda li jbierek lil dawk li jonoraw isem Alla.
Dak kien perjodu fejn il-poplu t’Alla kien stmat bħala fl-infanzja tiegħu. Issa, bl-avvent ta’ Kristu u l-milja tar-rivelazzjoni divina, il-knisja daħlet fil-maturità tagħha, fi stadju ta’ adultezza. Qabel, bħallikieku mat-tfal ċkejknin tiegħu, Alla għoġbu illi jagħtihom żgangilli u ġugarella, mentri fid-dispensa preżenti, Alla jittratta magħna bħala adulti, u allura ma niskandalizzawx irwieħna meta nisimgħu lil Pawlu jgħid illi “Alla esibixxa lilna l-appostli l-aħħar nett, bħallikieku kkundannati għall-mewt, għax sirna spettaklu għall-univers, kemm għall-anġli kif ukoll għall-bnedmin...Sa dis-siegħa stess ninsabu nġuħu u għatxana, bi ħwejjeġ imċerċra, jittrattawna brutalment, bla dar fissa. Nitħabtu, naħdmu b’idejna stess. Meta nkunu inġurjati, inbierku; meta nkunu ppersegwitati, nissaportu” (1 Korintin 4:9,11-12).
Mhux għax Alla nesiehom. Jaf li bil-grazzja tiegħu nifilħu għal trattament bħal dan. Bih jittrenjana nimxu bil-fidi, mhux bid-dieher. Lil Alla nitgħallmu nħobbuh, mhux għax jagħtina, iżda għax hu s-Sovran imbierek, Sid is-sidien. Sadattant uriena illi provdielna ħwejjeġ aħjar, ħwejjeġ spiritwali u smewwitija.
Talba: “Mill-bidu sat-tmiem, Mulej, int tittratta magħna bi grazzja liema bħalha. Ir-relazzjoni tagħna miegħek ma tiddependix fuq il-prestazzjoni tagħna, iżda fuq il-patt tiegħek; u int stess tagħtina l-ħila biex inkunu leali lejk. Għaldaqstant, ladarba nirċievu saltna li ma tistax tkun imriegħda, ħa nuru gratitudni, li biha nkunu nistgħu nqimuk b’mod aċċettabbli, b’riverenza u timenza. Ammen.”
Comments